Каземиро: "Дон Карлонинг хонасига кирсам, у йиғлаб ўтирган экан..."
«Реал» ҳаётида чуқур из қолдиган бразилиялик Каземиро El Chiringuito de Jugones нашрига берган интервьюсида илк марта нега «МЮ»га кетишни хоҳлагани хусусида ошкора гапирди.
Бошқача айтганда, тарбияланувчилардан тузилган ҳозирги рейтинг қандай кўринишда? Олдинга ўтиб айтиш керак, рўйхатнинг олд қаторларида «Реал» мактабида таҳсил чиқарганлар етарли. Килиан Мбаппе ва Винисиус Жуниор ҳам ҳисобга киритилган, албатта.
Маркус Рэшфорд яқинда «МЮ» билан шартномасини янгилади. Унга кўра, англиялик вингер 2028 йилгача «Олд Траффорд»да қолиши керак. The Times нашри маълумоти бўйича айтсак, Маркус энди ҳафтасига 375 минг евро миқдорида маош олади. Демакки, унинг йиллик иш ҳақи 18 млн. еврога етади. Лекин Рэшфорд «МЮ»да энг кўп маошга эга футболчи эмас, барибир. Бинобарин, Жейдон Санчо, Каземиро ва Рафаэль Вараннинг гонорари миқдори англияликникидан баланд ҳамон. Маркус эса АПЛнинг энг сердаромад (маош масаласида) тарбияланувчисига айланди. У бу борада йилига 15 млн. евро олаётган ҳимоячи Рис Жеймс- («Челси»)дан ўзиб кетди.
Хўш, жаҳон футболида энг кўп маошга эга 20 нафар тарбияланувчи рўйхатида кимлар бор? Аввалига қандай футболчи тарбияланувчи саналиши тўғрисида қисқача тўхталиш керак. ЧЛ регламентининг 44-бандида бу борада алоҳида тушунтириш берилган: 15-21 ёш оралиғида камида 3 йил (кетма-кет ёки жами) муайян клуб тизимида шуғулланган футболчи унинг тарбияланувчиси ҳисобланади. Шу критерияга асосан, Килиан Мбаппе («ПСЖ»), Винисиус Жуниор («Реал») ва Альфонсо Дэвис («Бавария») тегишлича Париж, Мадрид ҳамда Мюнхен клублари тарбияланувчиси мақомидалар. Зеро, улар бу жамоалар сафига 18 ёшда қўшилишган. Рейтингнинг юқори қисми Мбаппе ва Винисиусга тегишли эканлигини ҳам алоҳида айтиш керак.
Агар ушбу рейтинг ўтган мавсум стартида тузилганида, Жерар Пике (ҳафтасига 530 минг евро) ва Серхио Бускетс (ҳафтасига 461 минг евро) анча юқорига жойлашардилар. Айни ҳолатда лигалар ўртасида қизиқарли тақсимотни кўриш мумкин: топ-20да Ла Лигадан 9 нафар, АПЛдан эса 8 нафар тарбияланувчи бор. Бундеслига 2 нафар футболчига эга бўлса, Мбаппе Лига 1нинг ягона вакили ҳозирча. Рейтингда «А» сериянинг бирор тарбияланувчиси йўқлиги ҳам эътиборга молик (Италияда энг кўп иш ҳақига эга тарбияланувчи Даниэле Ругани бўлиб, «Ювентус»дан ҳафтасига 125 минг евро олади). «Ре-ал» эса рейтингга тушган тарбияланувчилари сони бўйича етакчи, тўғри, унинг беш вакилидан 4 нафари рўйхатнинг энг қуйи қисмида. Винисиус - «Реал»нинг энг кўп пул топаётган тарбияланувчиси, шубҳасиз.
