Катта маош эвазига юлдузларни ўзига тортаётган Саудия Про-лигасининг янги мавсумига қуръа ташланди.
Демак, чемпионат 11 август куни «Ал-Аҳли» - «Ал-Ҳазем» ўйини билан старт олади. Айтиш жоиз, элитага қайтган донгдор «Ал-Аҳли» сафида Эдуар Менди ва Роберто Фирмино бор. Карим Бензема ва Н`Голо Кантенинг янги клуби - амалдаги чемпион «Ал-Иттиҳод» 1-турда «Ар-Раед»га қарши майдонга тушади. Криштиану Роналду ёнига Марцело Брозовични қўшган «Ал-Наср» эса Стивен Жеррард қўл остига ўтган «Ал-Иттифоқ» меҳмони бўлади. Калиду Кулибали, Рубен Невес ва Сергей Милинкович-Савични харид қилган асосий шов-шувчи «Ал-Ҳилол» ҳам стартда сафарга чиқади. Рақиб - «Абҳа». Тақвимга кўра, Роналду ва Бенземанинг илк арабча тўқнашуви («Ал-Наср» - «Ал-Иттиҳод») 14-16 декабрь кунлари кузатилади.
