«Барса» «бозор»ни бошлади

Лондоннинг «Челси» клуби билан амалдаги келишуви якунига етгач, эркин агентга айланган Андреас Кристенсен «Барселона» футболчисига айланди. Даниялик ҳимоячи каталонияликлар билан 2026 йилга қадар келишувни имзолади. Қайд этилишича, шартномани 26 ёшли ҳимоячининг товон пули миқдори 500 миллион евро сифатида белгиланган. Кристенсен 7 июль куни расман таништирилади. Маълумот учун, Андреас 2014-2022 йиллар давомида «Челси» шарафини ҳимоя қилиб, лондонликлар сафида ЕЧЛ, Европа лигаси, клублар ўртасидаги ЖЧ, Европа Суперкубоги, Англия кубоги ва Англия лига кубогида зафар қучган.

«Милан» билан хайрлашган Франк Кессье ҳам фаолиятини Испанияда давом эттирадиган бўлди. «Барселона» клуби Кессье билан 2027 йилга қадар шартнома имзоланганини расман эълон қилди. «Милан» собиқ ўйинчиси каталонияликлар таркибига эркин агент сифатида қўшилган. 26 ёшли Кот-Д'Ивуар миллий жамоаси аъзоси якунланган мавсум миланликлар сафида 36 ўйинда майдонга тушиб, 6та голга муаллифлик қилган. У жамоаси билан скудеттони қўлга киритгач, шартномани узайтирмасликка қарор қилганди.