Бир уринишда ноодатий рекорд

Унда келтирилишича, 18 ёшли футболчи 5 йиллик шартнома остига имзо чекди. Олдинроқ «Мадрид» туркиялик иқтидор учун 20 млн. евро тўлаши маълум қилинганди. Қолаверса, 10 «лимон»га тенг бонус ҳам белгиланган. Бундан ташқари, ярим ҳимоячининг кейинги трансфер суммасидан 20 фоизи «Фенербахче»га тегади. «Генчлербирлиги» тарбияланувчиси «Фенер»га ўтгач, қисқа вақтда 51та ўйинда иштирок этиб, 9та гол ва 12та ассист қайд этди. Гюлер шунингдек, Туркия миллий жамоаси сафида 4 марта майдонга тушишга улгурди.

Диққат қилинг, Арда Гюлер «Мадрид»даги дастлабки 4 соатдаёқ клуб тарихига кирди. Яъни шу вақт ичида «Реал»нинг «Твиттер» тармоғидаги расмий аккаунтида ёш футболчига аталган «Хуш келибсан!» ёзуви («твит») 504 минг лайк тўплади ва бу рекорддир! Лайк миқдори кейинчалик ҳам соат сайин кўпайиб борди, албатта. Лайк тўплаш бўйича «Реал»нинг аввалги рекорди Карим Бенземага тегишли эди. Франциялик футболчининг ЧЛ-2021|2022 «плей-офф» босқичидан ўрин олган «Челси»га қарши «Сантьяго Бернабеу»даги ўйинда урган голига боғлиқ «твит» ортидан энг юқори кўрсаткич қайд этилганди.

Туркиялик мухлисларнинг ижтимоий тармоқларда анча фаол эканликларини ҳисобга олсак, Гюлерга аталган «твит» билан рекорд янгиланганида ажабланарли томони йўқ. Турк­лар ҳаттоки, машҳур футболчиларнинг «Галатасарой», «Фенербахче» ва «Бешиктош» клубларига ўтишларига қаратилган флеш-моб уюштиришлари билан ҳам машҳурлар.

Германиялик турк Месут Озил 2022 йилнинг март ойидаёқ Арда Гюлер келажакда глобал юлдуз мақомини олишини айтганди: «Турк футболида салоҳият бобида мендан кучлироқ «10-рақам» борми? Мушкул савол. Миямга аниқ исм келяпти. Бир укам бор, унга ишонаман. Умид қиламанки, Аллоҳнинг ўзи йигитчани ёмон кўзлардан асрайди - бу Арда Гюлер». Таъкидланишича, Озил қўнғироқ орқали  18 ёшли футболчини «Реал» таклифини қабул қилишга ҳам ундаган. Айтиш жоиз, Арда аслида «Барселона»ни танлашга мойилроқ эди.