Дениз Айтекин халқаро фаолиятини якунлади

44 ёшли ҳакам 2011 йилдан бери ФИФА ҳакамлари рўйхатида. Ўшандан бери у Чемпионлар Лигасида 25, Европа Лигасида 29 ва миллий жамоалар иштирокидаги 23 ўйинни бошқарди.  Айтекин 2016/17 йилги ЕЧЛ 1/8 финалидан ўрин олган «Барселона» - «ПСЖ» ўйинида бош ҳакам бўлган ва каталонияликлар фойдасига чиқарган айрим қарорлари баҳсларга сабаб бўлган. Париж клуби биринчи ўйинда йирик ҳисобда ғалаба қозонган (4:0), аммо Дениз бошқарган жавоб беллашувида 1:6 ҳисобида енгилиб турнирни тарк этган.

«Сўнгги бир неча кун ичида оилам ва дўстларим билан халқаро ҳакамлик фаолиятим ҳақида кўп гаплашдим. Натижада 12 йиллик хизматдан сўнг ФИФА рефериси лавозимини тарк этаётганим тўғридек туюлди. Қароримни УЕФА бош ҳакамлар инспектори Роберто Розетти билан ҳам муҳокама қилдим. Агар соғлом бўлсам, яна бир неча йил Германия чемпионатида энг юқори савияда ишлайман. Бундан кейин бор эътиборимни Бундеслига ва ички мусобақаларга қаратиб, кейинги бир неча йилни иложи борича муваффақиятли ўтказишни истардим. Олдиндаги вазифаларни интиқлик билан кутаман!» - деди Айтекин.