Гринвуд таркибга қайтарилади

The Sun хабарига кўра, «МЮ» бош мураббийи Эрик тен Хаг янги мавсум олдидан 21 ёшли англиялик ҳужумкор футболчини таркибга қайтаришни истамоқда. Клуб раҳбарияти эса Гринвудга нисбатан ҳозирда ҳеч қандай айблов бўлмаса-да, унинг қайтиши ортидан бутун жамоа жамоатчиликнинг босимига учрашидан хавфсирамоқда. Қайд этилишича, Гринвуднинг ўзи ва унинг вакиллари ҳам ўйинчи борасида «Юнайтед»нинг режалари қандай эканлигини билмоқчи. Мэйсон жамоа аъзолари билан бир неча марта учрашган ва уларга айбсизлигини айтгач, «МЮ» футболчилари ҳам унинг таркибга қайтишига хайрихоҳлик билдирган. Аввалроқ, Италиянинг «Милан» ва «Ювентус» клублари Гринвудни ижарага олиш борасида «МЮ»га таклиф тайёрлаётгани ҳақида хабарлар тарқалганди. Эслатиб ўтамиз, 2022 йилнинг январь ойида Мэйсоннинг қиз ўртоғи Гарриет Робсон футболчи томонидан тажовузга учрагани, Гринвуд унга доимий тарзда зўравонлик ишлатганини маълум қилгач, Манчестер полицияси айблов бўйича футболчини ҳибсга олганди. Бир йил ўтиб, англиялик футболчига нисбатан айблов бекор қилиниб, суд гувоҳларнинг кўрсатма беришни рад этгани сабабли иш ёпилганини маълум қилганди. Маълумот учун, Мэйсон 2021/22 йилги мавсум АПЛдаги 18 ўйинда 5та голга муаллифлик қилган эди. У 2022 йилнинг февраль ойидан буён майдонга тушгани йўқ.