Коул Палмер яқинда АПЛнинг сентябрь ойидаги энг яхши футболчиси сифатида тан олинди.
У шунинг баробарида Англия миллий жамоасининг 2024 йилдаги энг яхши футболчиси бўлди. Коул (яъни Cold) «Челси»га шу қадар яхши тушдики, рекорд ортидан рекорд ўрнатмоқда. Мисол учун, Палмер аввалги ой бир бўлим (аниқроғи, 20 дақиқа)да «покер» қайд этиб, АПЛ тарихида бундай натижа кўрсатган биринчи футболчига айланди. Коулнинг ўша ўйинда кийган футболкаси кейинчалик кимошди савдосида 34 минг фунт стерлингга сотилди. Қойил! Sports.ru сайтининг қуйидаги мақоласи эса Палмер «Манчестер Сити»дан 45 миллион фунт стерлинг эвазига «Челси»га ўтганидан буён қандай индивидуал совринларни қўлга киритгани ҳақида.
Ўйиннинг энг яхши футболчиси. Палмер ўтган мавсум чиндан ҳам, жуда зўр ўйнади. У голлар урди, ассистентликни канда қилмади ва шунчаки, «Челси»ни ўз ортидан эргаштирди. Ижтимоий тармоқларнинг энг эътиборли фойдаланувчилари ҳисоб-китобларига кўра, Коул Палмер нақ 21 марта ўйиннинг энг яхши футболчиси сифатида эътироф этилди. Бу фақат АПЛ-2023|2024 ҳисоби! Дейлик, Палмер жорий мавсум ҳам ўйиннинг энг яхши футболчисига аталган совринни бир неча марта қўлга киритди. 36та ўйиндан 21тасида энг яхши бўлиш - буни ақлга сиғдириш қийин. Палмер жумладан, «Манчестер Сити», «МЮ» («хет-трик»), «Эвертон» («покер»), «Арсенал», «Тоттенхэм» ва «Ньюкасл»га қарши кечган жиддий ўйинларда индивидуал соврин ютди. Умуман олганда, Палмер «Челси» сафидаги 3та учрашувда камида 3та гол урди (барчаси АПЛда): 1та «хет-трик» ва 2та «покер». У шунингдек, АПЛнинг 1та ўйинида ассист бўйича ҳам «хет-трик» (3та узатмаси ҳам Нони Мадуэкега қаратилганди)ка эришгани билан мақтаниши мумкин.
Ойнинг энг яхши футболчиси. Палмер 2024 йилнинг апрель ойида АПЛ лауреатига айланди. Бунга қадар «Челси» вакиллари 2018 йилнинг сентябридан буён (ўшанда Эден Азар эътироф этилганди) ойнинг энг яхши футболчисига аталган совринга етолмагандилар. Коул шунинг баробарида апрелда ойнинг энг чиройли голи муаллифи сифатида ҳам қўшимча соврин олди. Жорий мавсум эса «Челси»нинг янги етакчиси аллақачон 2та индивидуал мукофотга муносиб кўрилди - август ойида энг чиройли гол учун бериладиган соврин эгасига айланган ҳужумкор футболчи сентябрда яна бош лауреат бўлди. Айтиш керак, «Челси» тарихида биргина афсонавий Фрэнк Лэмпард (4 марта) АПЛда ойнинг энг яхши футболчисига аталган совринни Палмердан кўпроқ қўлга киритган.
Ўтган мавсум якуни бўйича индивидуал совринлар. Коул Палмер катта футболдаги биринчи тўлақонли мавсумини қойилмақом рақамлар билан безади. Айтиш керак, англиялик иқтидор май ойида 22 ёшга тўлди. Энди унинг асосий статистикасига қаранг: АПЛда 22та гол ва 11та ассист, кубок баҳсларида эса 3та гол ва 4та ассист. Хуллас, Палмер «Гол+пас» тизими бўйича АПЛ-2023|2024-нинг энг сермаҳсул футболчиси бўлди - 33 балл. Ёш йигитча бу борада Эрлинг Холанд ва Олли Уоткинс (32 баллдан)ни ортда қолдирди. London Football Awards шунга яраша, март ойида «Челси» вакилини мавсумнинг энг яхши ёш футболчиси соврини билан тақдирлади. Палмер шунинг баробарида АПЛнинг энг яхши футболчиси ва энг яхши ёш футболчиси бўлишга ҳам даъвогарлик қилди. Бунда асосий соврин Фил Фоденга насиб этган бўлса, иккинчи йўналишда айнан Коул ғолиб чиқди. Шундан кўп ўтмай, PFA ҳам қаҳрамонимизни чемпионатнинг энг яхши ёш футболчиси сифатида эътироф этди. Шу ўринда битта факт эътиборга лойиқ: «Челси» вакиллари ҳар 10 йилда бир марта PFA талқини бўйича мавсумнинг энг яхши ёш футболчисига аталган совринга эга чиқишмоқда. 2004 йил - Скотт Паркер, 2014 йил - Эден Азар ва 2024 йил - Коул Палмер.
Коул шунингдек, АПЛ мавсумидаги энг яхши перформанс (кўрсаткич) учун махсус мукофот олди («Стэмфорд Бриж»да «МЮ»га қарши кечган ва 4:3 ҳисобида якунланган ўйиндаги натижаси эътироф этилди). Қолаверса, у мухлислар иштирокидаги сўров натижаларига биноан, АПЛнинг энг яхши футболчиси бўлди ва PFA таъсис этган махсус совринни қўлга олди. «Челси» ичида эса Коул Палмер бирданига 2та соврин соҳибига айланди. Яъни мухлислар ҳам, футболчилар ҳам уни клубнинг мавсумдаги энг яхши футболчиси сифатида тан олишди. Иккинчи сўровга тўхталсак, Палмернинг ўзи Мало Гюстога овоз берди. Яна солиштирамиз: «Челси» тарихида Коулга қадар атиги 3 нафар футболчи ҳар икки йўналишда клуб лауреатига айланган. Булар - Хуан Мата, Эден Азар ва Виллиан. Қисқаси, Палмер дебют мавсумидаёқ шу гуруҳга қўшилди. Палмернинг «Олтин тўп» учун 30 нафар номзод рўйхатига киритилгани эса шунча индивидуал совринларга худди «десерт» каби тушди. Таърифлашга тил ожиз!
Англия терма жамоасининг энг яхши футболчиси. Палмер миллий жамоадаги дебютини 2023 йилнинг ноябрь ойида нишонлади. Унинг ўзи жамоа «заявка»сида фамилиясини кўрганида, аввалига бунга ишонмагани, кимдир ҳазил тариқасида қўшиб қўйгани ҳақида ўйлаганини айтган эди. 2024 йилнинг июнь ойига келиб, Палмер терма жамоадаги голлари ҳисобини очди ва Европа чемпионатига йўл олди. Бироқ Гарет Саутгейт Германияда энг зерикарли ва прагматик футболга таяниб, бошида «Челси» вакилига умуман имконият бермади. «Плей-офф» босқичи бошлангач эса, Палмер бошланғич таркибда бўлмасада, ҳар ҳолда, тез-тез майдонга тушди. Шу жойда табиий савол туғилади: унда терма жамоа футболчилари иштирок этган сўровда Коул Палмер ниманинг ҳисобига ғалаба қозонди? Жавоб Евро-2024нинг охирги 3та ўйини (чорак финал, ярим финал ва финал)да яширин. Эътиборли томони, Коул уларнинг барчасида захирадан майдонга тушди. Муҳими, Палмер Швейцария термасига қарши кечган чорак финал баҳсида ҳужум ҳаракатларини яққол кучайтирди ва пенальтилар серияда биринчи зарбани хотиржамлик билан голга айлантирди. Нидерланд-лар билан бўлган ярим финал ўйинида эса энг охирги паллада Олли Уоткинснинг ғалаба голига ассистентлик қилди. Коул финалда ҳам ўзини кўрсатди: испанлар дарвозасини нишонга олиб, ҳисобни тенглаштирди ва Европа чемпионати тарихида ҳал қилувчи баҳсга захирадан қўшилган ҳолда гол урган энг ёш футболчи бўлди. Бироқ инглизлар якунда 1:2 ҳисобида мағлубиятни тан олишди, барибир. Энди яна бир факт: 2010 йилдан буён «Челси»дан Англия терма жамоасининг муайян йилдаги энг яхши футболчиси чиқмаётганди. Палмерга қадар Эшли Коул шундай эътирофга эришган. Унгача эса Фрэнк Лэмпард 2 марта (2004 ва 2005 йиллар) терма жамоанинг бош лауреати бўлганди.
Коул Палмер яқинда «Челси» билан шартномаси муддатини 2033 йилгача узайтирди, албатта, анча яхшиланган бандлар асосида. «Янги келишувдан мамнунман. Илк мавсумда кўп нарсаларга эришдим. Умид қиламанки, «Челси» билан ҳам жамоавий, ҳам шахсий ютуқларни қўлга киритишда давом этаман. Зеро, илк кунданоқ бу клубда ўзимни худди уйдагидек ҳис қиляпман...», - деди Коул узоқ муддатли шартнома остига имзо чекканидан сўнг.
С.РАҲМОНОВ тайёрлади
