«Атлетик» ҳужумчиси Иньяки Уильямс оёғида шиша бўлаги билан 2 йил ўйнагани маълум бўлди.
29 ёшли футболчи сўнгги бир неча ой давомида оғриқлардан қийналди. Икки йил муқаддам Уильямс синган ойнани босиб олган, шифокорлар унга ёрдам кўрсатишган ва тез орада жароҳатидан фориғ бўлганди. «Испания кубоги финалидан сўнг Иньякининг оёғини сканердан ўтказдик ва унда ҳали ҳам шиша бўлаги борлигини аниқладик. Уни биринчи марта тикишганда, шиша бўлаги ўша ерда қолган. Бундан ташқари, бу кичик бўлак эмас, тахминан 2 см. Суяк ёнида жойлашган. Тўғрисини айтсам, шифокор ва мен кулиб юбордик, чунки бунга ишонолмадик», - деди бильбаоликлар бош мураббийи Эрнесто Вальверде. Эслатиб ўтамиз, Уильямс Ла Лигада кетма-кет 251та ўйин ўтказиб, Испания чемпионати рекордини ўрнатган. Ажойиб серия шу мавсумда узилди.
