Италияда яна молиявий фирибгарлик!

Football Italia нашрининг хабарига кўра, Рим прокуратураси керакли ҳужжатларни, «Интер»га оидларини Милан прокуратурасига, «Сассуоло»га оидларини Моденага, «Аталанта»га оидларини Бергамога юборган. Бу ҳужжатларнинг барчаси молиявий фирибгарликка оид. Эслатиб ўтамиз, ўтган йили худди шу вазият сабабли «Ювентус»дан 10 очко олиб қўйилганди. Молиявий фирибгарлик бўйича 2017 йилдан 2021 йилга қадар амалга оширилган 12та трансфер шубҳа остига олинган. Булар: Грегуар Дефрель («Сассуоло»дан «Рома»га), Риккардо Маркисса («Рома»дан «Сассуоло»га), Давиде Фраттези («Рома»дан «Сассуоло»га), Николо Заньоло («Интер»дан «Рома»га), Давиде Сантон («Интер»дан «Рома»га), Ража Наингголлан («Рома»дан «Интер»га), Брайан Кристанте («Аталанта»дан «Рома»га), Марко Тумминелло («Рома»дан «Аталанта»га), Леонардо Спинацолла («Аталанта»дан «Рома»га), Лука Пеллегрини («Рома»дан «Ювентус»га), Костас Манолас («Рома»дан «Наполи»га) ва Амаду Диавара («Наполи»дан «Ромага»). Наинголаннинг «Рома»дан «Интерга»га ўтгани бундай молиявий «ўйин»нинг ёрқин мисоли. Келишувга биноан клуб Сантон ва Заньолонинг хизматларини ва 38 миллион еврони «Интер» клубига ўтказиши керак бўлган. Клубнинг трансфердан олган фойдаси 31 миллион қилиб кўрсатилган. Ваҳоланки, ушбу трансфердан ғазнага 24 миллион фойда келган.