Marca ўтган мавсум қаҳрамонларини тақдирлади

«Реал» ярим ҳимоячиси Ла Лигада мавсумнинг энг яхши футболчисига топшириладиган Алфредо Ди Стефано совринини қўлга киритди. 2023/24 йилги мавсумда Беллингэм Испания юқори дивизионида «Реал» учун 28та ўйин ўтказиб, 19та гол ва 6та ассистни ўз ҳисобига ёздириб қўйди. Англиялик футболчи Ла Лига тўпурарлари рўйхатида фақат ҳужумчилар Александр Сёрлот ва Артём Довбиклардан ортда қолди. Шунингдек, Артём Довбик Ла Лиганинг ўтган мавсумдаги энг яхши тўпурарига аталган совринни олди. Аввалги мавсумда «Жирона»да тўп тепган Украина миллий жамоаси ҳужумчиси Испаниянинг Маrca нашридан Пичичи совринини қабул қилиб олди. 2023/24 йилги мавсумда Довбик Ла Лигада 24та гол урди ва чемпионат тўпурари бўлди. Ҳозир у «Рома»да ўйнайди. Ла Лиганинг энг яхши мураббийига аталган соврин эса «Жирона»ни ЕЧЛга олиб чиққан Мичелга топширилди. Мухлислар талқинига кўра энг яхши футболчи, деб эса «Бетис» ярим ҳимоячиси Иско топилди.