ЖЧ-2022: Месси орзуси сари яна бир қадам...

Биринчи ярим финалда Аргентина Хорватия билан тўқнаш келиб, рақиб дарвозасига жавобсиз 3та тўп киритди ва ўз тарихида 6-марта тўрт йилликнинг энг нуфузли турнири финалига йўл олди. Айтиш жоиз, бунгача фақат Германия терма жамоаси финалга улардан кўпроқ чиқишган. Немислар 8 марта финалда ҳаракат қилишган.

Учрашувда Месси 11 метрлик нуқтадан ҳисобни очган бўлса, Альварес дублга эришди. Лео ажойиб рейди орқали ассистни ҳам ўз ҳисобига ёздириб қўйди ва ушбу мундиалда гол+паслар сони бўйича Франция ҳужумчиси Килиан Мбаппени (7) ортда қолдириб, пешқадамга айланди — 8. Тўпурарлар пойгасида эса иккала футболчида ҳам голлар сони тенглашди — 5. Аргентинанинг финалдаги рақиби кеча Франция - Марокаш баҳсида аниқланди. Финал 18 декабрь куни шу стадион - «Лусайл»да бўлиб ўтади.

*** Лионель Месси ЖЧ-2022 ярим финалида Хорватияга қарши ўйиннинг биринчи ярмида пенальтини аниқ амалга оширди. Бу аргентиналикнинг жорий турнирдаги 5-голи, жами жаҳон чемпионатларидаги 11-голи. Месси ҳозирги футболчилар орасида ушбу тоифадаги энг яхшисига айланди. Томас Мюллер ҳисобида 10та гол бор. Рекорд эса Германия терма жамоасининг собиқ ҳужумчиси Мирослав Клозега тегишли бўлиб, у 16та гол урган. Пеле ҳисобида 12та гол бор.

*** Аргентина терма жамоаси ҳужумчиси бразилиялик Роналдунинг жаҳон чемпионатидаги ютуғини такрорлади. Хорватия билан ўйин «ПСЖ» футболчиси учун гол ёки ассист қайд этган 13-ўйини бўлди. 1966 йилдан буён чемпионатнинг шунча ўйинида фақат Месси ва Роналдо «голҚпас» тизими бўйича очко тўплашга муваффақ бўлган.

*** Месси иккинчи бўлимда Хулиан Альварес голига узатма берди. Бу Мессининг жаҳон чемпионатлар плей-офф босқичидаги 6-ассисти бўлди. Аслида, Аргентиналик футболчи Нидерландия терма жамоаси билан чорак финал ўйинида рекорд ўрнатиб улгурганди. Бу гал уни янгилаб қўйди. Аввалги рекордчи Пеле 4та голли узатмани амалга оширганди.

*** Дарвоқе, Месси шу ўйинда аргентиналиклар ўртасида жаҳон чемпионатларида урган голлари сони бўйича ҳам рекордни янгилади - Габриэль Батистута ҳисобида 10та гол бор эди.

АРГЕНТИНА - ХОРВАТИЯ - 3:0 (2:0)

13 декабрь. Лусайл. «Лусайл» стадиони. 88966 томошабин

Бош ҳакам: Даниэле Орсато (Италия).

Голлар: Месси (34-пен.), Х.Альварес (39, 69).

Аргентина: Э.Мартинес, Молина (Фойт, 86), Отаменди, Ромеро, Тальяфико, Де Пауль (Паласиос, 74), Мак Аллистер (А.Корреа, 86), Паредес (Лис.Мартинес, 62), Э.Фернандес, Месси, Х.Альварес (Дибала, 74).

Хорватия: Ливакович, Юранович, Ловрен, Гвардиол, Соса (Оршич, 46), Модрич (Майер, 81), Ковачич, Брозович (Петкович, 50), Перишич, Пашалич (Влашич, 46), Крамарич (Ливайя, 72).

Огоҳлантиришлар: Ромеро (68), Отаменди (71) - Ливакович (32), Ковачич (32).

Ўйиннинг энг яхши футболчиси: Лионель Месси (Аргентина).

Ўйин статистикаси

АРГЕНТИНА   ХОРВАТИЯ

Кўрсаткичлар 

9            Зарба                   11

7            Аниқ зарба         2

15          Қоида бузиш      8

2            Бурчак тўпи       4

1            «Оффсайд»         0

39% Тўп назорати 61%

14 декабрь

ФРАНЦИЯ - МАРОКАШ

ТЎПУРАРлар:

Месси (Аргентина) - 5та

Мбаппе (Франция) - 5та

Жиру (Франция) - 4та

Х.Альварес (Аргентина) - 4та...