“Навбаҳор” илк ўйинни ўз майдонида ўтказади

Осиё футбол конфедерацияси (AFC) томонидан мазкур нуфузли мусобақада Ўзбекистон учун “2+2” кўринишида йўлланмалар тақдим этилган. Шу сабабли, “Навбаҳор” футболчилари чемпионлар лигасининг гуруҳ босқичидан жой олиш учун Осиё чемпионлар лигаси 2023/2024 йиллар мавсуми тақвимига кўра, “плей-офф” босқичи доирасида иккита ўйин ўтказиши лозим. Клуб матбуот хизматининг маълум қилишича, Самвел Бабаян шогирдларига Уммоннинг “Ал-Сиб” ва Қатарнинг “Ал-Вакра” жамоалари рақиб бўлади. Уммонликларга қарши кечадиган учрашув Наманганда, қатарликлар билан бўладиган баҳс эса араблар майдонида бўлиб ўтиши режалаштирилган.  
Ижтимоий тармоқларда “Ал-Сиб” клубини лицензиялаш талабини бажармаганлиги боис, “Лочинлар” Осиё чемпионлар лигаси саралашини иккинчи босқичдан бошлаши, яъни, Намангандаги ўйин ўтказилмаслиги борасида хабарлар тарқалди. Бироқ, “Ал-Сиб” клуби раҳбарияти ўз расмий сайтида жамоа миллий чемпионат ва халқаро мусобақа лицензиясини олгани айтилмоқда.  
Демак, “Навбаҳор” нинг ОФК кубоги соҳиби “Ал-Сиб” жамоаси билан баҳси жорий йилнинг 15 август куни Наманган шаҳридаги “Марказий” стадионда бўлиб ўтади. Мазкур жуфтликда “Навбаҳор” ғалаба қозонган тақдирда 22 август куни Қатар юлдузлар лигаси иштирокчиси – “Ал-Вакра” клубига қарши сафарда тўп суради.

Оқилхон Дадабоев, ЎзА