Ҳожимат Эркинов «Пахтакор» билан хайрлашди, бош мураббий Славче Войнески ҳам...

«Ҳаммага Ассолому алейкум! Бугун мен «Пахтакор» жамоаси билан хайрлашаман. Мен учун бу жамоа энг кучли ва энг севимли жамоа бўлиб қолмоқда. Мен 10 ёшимдан бери «Пахтакор»даман ва шу вақт ичида шуни айтишим керакки, кўпчилик ўз кучини, меҳнатини сармоя қилди ва мен улардан чексиз миннатдорман! Барча мухлисларга, мураббийлар ва ҳамкорларга, барча жамоа аъзоларига раҳмат!», - дея ёзади Эркинов инстаграмдаги саҳифасида.

Аввалроқ, Ҳожимат Эркинов Москванинг «Торпедо» клубига ўтиши мумкинлиги ҳақида хабарлар тарқалганди. 21 ёшли футболчи тез орада легионерга айланиши кутилмоқда.

Эслатиб ўтамиз, бунгача «Пахтакор» Сардор Рашидовни Қатар клубига трансфер қилган, болгариялик ҳимоячиси Камен Хаджиев билан хайрлашган эди

***
Клуб расмий сайти хабарига кўра, ярим йиллик фаолиятидан кейин жамоа устози Славче Войнески истеъфога чиқарилган. Янги мураббий эса тез орада эълон қилиниши маълум қилинган. 

«Шимолий македониялик мутахассис билан «Пахтакор» ўртасидаги шартнома муддатидан олдин бекор қилинди.

Клуб ва мураббий ўртасидаги битим икки томон келишувига кўра бекор қилинишига келишиб олинди. Янги бош мураббий номи тез кунларда маълум қилинади. Биз Войнескига жамоамиздаги фаолияти учун миннатдорчилик билдириб, унинг кейинги ишларига омад тилаймиз!», - дейилади клуб хабарида. 

«Пахтакор» Войнески мураббийлиги қўл остида янги мавсумда ОЧЛда гуруҳдан кейинги босқичга чиқа олмади. Суперлигада эса 12 ўйиндан кейин 23 очко билан 3-ўринда бормоқда.

Аввалроқ, клуб спорт директори Жаъфар Ирисметов ҳамда техник директор Собир Ҳодиев жамоа билан хайрлашган эди. Уларнинг ўрнига Максим Шацких иш бошлаганди.