«ПСЖ»ни бошқариш учун асосий номзодлар...

Париж клуби мавсум якунидан кейин жамоа устози Кристоф Гальтье билан хайрлашмоқчи. Раҳбарият бу мураббий қўл остида Франция чемпионатида зафар қучиш мумкин экани, Чемпионлар лигасида эса муваффақият қозонишига ишонмаяпти. Le Parisien хабарига кўра, клуб президенти Носир ал Хелайфи ва спорт директори Луиш Кампуш испаниялик мутахассислар Луис Энрике ва Хаби Алонсо номзодларини кўриб чиқишмоқда. «ПСЖ» 53 ёшли Энрикенинг «Барса» ва Испаниядаги тажрибаси Парижда қўл келишига ишонмоқда. Ишсиз саналмиш Энрике музокараларга тайёр. Шунингдек, раҳбарият Хаби Алонсонинг Бундеслигадаги муваффақиятини юқори баҳоламоқда ва унинг «Байер»ни тарк этиш имкониятларини кўриб чиқмоқда. Аввалроқ, «ПСЖ»ни Жозе Моуриньо ёки жамоанинг собиқ ўйинчиси саналмиш Тиаго Мотта бошқариши мумкинлиги ҳақида хабар қилинганди. Шунингдек, Хаби Алонсо «Байер»да ишини давом эттириб, 2024 йилда Карло Анчелоттидан сўнг «Реал»да ишлашни орзу қилаётгани айтилганди. Мадрид клуби ҳам жамоанинг собиқ аъзоси ҳисобланмиш Алонсонинг номзодига қизиқиш билдирган. Эслатиб ўтамиз, «ПСЖ» ёзги трансфер ойнасида Лионель Месси ва Неймар билан хайрлашмоқчи. Клуб янги мавсумда жамоани Килиан Мбаппе атрофида шакллантиришни режалаштирган.