Шупо-Мотинг – доимий эркин агент

Қаранг, 34 ёшли футболчининг бутун фаолияти давомида кузатилган барча ўтишлар қиймати 0га тенг. Яъни у бирор клуб сафига тўлақонли трансфер асосида қўшилмаган.
Аниқроқ айтсак, Эрик-Максим ҳозирга қадар Европанинг жами 5та клуби сафида ўйнаган бўлса, уларнинг ҳар бири билан эркин агент мақомида шартнома тузган. Фаолияти давомида трансферига энг кўп пул сарфланган футболчилар рейтинги ўз йўлига, камерунлик бундай рўйхатда мутлақ аутсайдерлар қаторида бўлади. Лекин факт шуки, эркин агент сифатида битим тузадиган футболчи клуб олдига ўз шарт­ларини баралла қўйиш имкониятига эга бўлади. Эҳтимолки, Шупо-Мотинг ҳам «Майнц», «Шальке», «Сток Сити», «ПСЖ» ва «Бавария» билан келишувга эришиш жараёнида бундан фойдалангандир. Шу маънода Рожер Виттманн ишига қойил қолиш керак. У ҳар сафар камерунлик мижози мақбул шартлар (1-3 йиллик) асосида келишувга эришишини таъминламоқда.