Улар ҳам шон-шуҳрат залига киритилди...

«Манчестер Юнайтед», «Вест Хэм» ва «Лидс» жамоаси собиқ футболчиси Рио Фердинанд мухлислар ўртасида ўтказилган онлайн сўровнома якунларига кўра, АПЛ шон-шуҳрат залидан жой олди. Шунингдек, «Челси» ва «Арсенал» клуби шарафини ҳимоя қилган Петр Чех ҳам шон-шуҳрат залига киритилди. Маълумот учун, АПЛ шон-шуҳрат зали 2021 йилда тасдиқланган бўлиб, унга биринчи бўлиб Алекс Фергюсон ва Арсен Венгер киритилган. Шунингдек, ўтган йиллар давомида Алан Ширер, Тьерри Анри, Эрик Кантона, Рой Кин, Фрэнк Лэмпард, Деннис Бергкамп, Стивен Жеррард, Дэвид Бекхэм, Пол Скоулз, Дидье Дрогба, Венсан Компани, Серхио Агуэро, Патрик Виейра, Уэйн Руни, Иан Райт ва Петер Шмейхель киритилган. Фердинанд 2002-2014 йиллар давомида «Манчестер Юнайтед» шарафини ҳимоя қилиб, 6 карра АПЛ чемпиони, 4 карра Англия Суперкубоги соҳиби, 2 марта Англия лига кубоги соҳиби ҳамда ЕЧЛ ва клублар ўртасидаги ЖЧ ғолиблигини қўлга киритган. Чех эса «Челси» билан 4 карра АПЛ чемпиони ва Англия кубоги ғолиби бўлган. Шунингдек, у 3 марта Англия лига кубоги, 2 марта Англия Суперкубоги соҳибига айланган. Петр ЕЧЛ ва Европа лигасида ҳам бир мартадан зафар қучган.