«Сити» АПЛдан четлатилиши мумкин...

АПЛ расмий сайти хабарига кўра, клубнинг 2009/10 йилги мавсумдан 2017/18 йилги мавсумга қадар йўл қўйган 100дан ортиқ молиявий қоидабузарлик ҳолатлари кўриб чиқиш учун тегишли қўмитага оширилган. Қайд этилишича, текширув жараёни 4 йилдан узоқ вақт давом этган. Жараён Der Spiegel газетасининг 2018 йилда «Манчестер Сити»ни молиявий қаллобликда айблаб, эълон қилган мақоласидан сўнг бошланган. АПЛ расмий сайтида келтирилишича, «Сити» 2009/10 йилдан 2017/18 йилги мавсумгача клубнинг молиявий ҳолати бўйича аниқ маълумотни тақдим этмаган. Хусусан, гап клубнинг даромадлари ва ҳаражатлари ҳақида кетмоқда. 2009/10 -2012/13 мавсумлар давомида клуб мураббийнинг шартномадаги маоши бўйича тўлиқ маълумотни киритмаган. Айнан шундай қоидабузарликлар 2010/11-2015/16 йилги мавсумлар оралиғида бир қатор ўйинчиларга нисбатан ҳам кузатилган. Қайд этилишича, 2013/14, 2014/15 ва 2017/18 мавсумларда «Ман Сити» УЕФАнинг лицензиялаш ва молиявий фэйр-плей қоидаларини ҳам бузиб келган. Бундан ташқари, клуб 2018 йилнинг декабрь ойидан ҳозирги вақтга қадар АПЛ билан текширув жараёнида ҳамкорлик қилмаган ва ташкилот талабига зид равишда зарур ҳужжатларни тақдим этишдан бўйин товлаган. АПЛ ушбу айбловлар бўйича тергов жараёнлари ёпиқ тарзда олиб борилишини маълум қилган. Daily Mail нашрининг ёзишича, «Манчестер Сити»га нисбатан эълон қилинган айбловлар ўз тасдиғини топса, клуб АПЛда очколардан маҳрум этилиши, ҳаттоки турнирдан чиқариб юборилиши мумкин.