«Ал-Ҳилол»нинг режалари катта

Sky Sports хабарига кўра, Саудия Арабистони қироллик оиласига тегишли бўлган клубнинг асосий мақсадларидан бири Лионель Мессини жамоага таклиф этиш масаласи бўлади. Ар-Риёд клуби раҳбарияти аргентиналик юлдузга йиллик 200 миллион фунт маош тўлаб, уни жаҳоннинг энг кўп ҳақ олувчи футболчисига айлантиришга тайёр. Саудияликлар Месси «ПСЖ»ни тарк этишга қарор қилса, уни Саудия Арабистонига кўчириш учун бор имкониятни ишга солмоқчи. Футболчи Париж клуби билан келишувини узайтирган тақдирда ҳам, саудияликлар бу режадан воз кечмоқчи эмас. Мессининг клуби билан амалдаги келишуви ёзда якунига етади. У ҳали шартномасини узайтирмаган. Қайд этилишича, саудиялик шаҳзодалар юлдуз футболчиларнинг мамлакатга келиши орқали Саудия Арабистони чемпионатини янада оммалаштиришни исташмоқда. «Ал-Ҳилол»нинг яқин келажакдаги режаларидан бири «Манчестер Сити» ярим ҳимоячиси Кевин де Брюйне ва «Ливерпуль» ҳужумчиси Муҳаммад Салоҳ трансферини амалга ошириш бўлади. Эслатиб ўтамиз, январь ойида «Ал-Наср» Криштиану Роналду билан 2,5 йиллик шартнома имзолади. Унга кўра, португалиялик 37 ёшли юлдуз «Ал-Наср»да йиллик 200 миллион евро ҳақ олиши хабар қилинганди.