Ельцин Техеда: «Энди 4-мундиалдан умидворман»

Ўз номи билан россиялик журналистлар эътиборини тортган футболчи турнирда гол уриш асносида ҳам назарга тушди. Россия федерацияси биринчи президенти шарафига ном олган стоппер гуруҳ босқичи 3-тур ўйинида кимсан Мануэль Нойерни ожиз қолдирди. Айтиш ўринли, бу Ельцин учун ЖЧдаги дебют гол бўлди.

- Суҳбат бошида озгина ортга қайтамиз, ЖЧ-2018 вақти исмингиз туфайли Россияда сизга қандай муносабатда бўлишди?

- Ҳа, эсимда, исмим ҳақида тез-тез сўрашган ва ҳаммага бунинг тарихини айтиб бергандим. Ота-онам Россия собиқ президентини жуда яхши кўришган, шунинг учун менга шундай исм қўйишган.

— Ельцинлар оиласига нима дейишни хоҳлардингиз?

- Айтадиган бирор гапим йўқ, шунчаки, исмим шундай ва бу ўзимга жуда ёқади. Очиғи, Ельцинлар оиласи ҳақида ҳеч нарса билмайман ҳам.

- Ельциннинг сиёсий фао­лияти билан танишмисиз? Эҳтимол, баъзи китобларини ўқигандирсиз...

- Ельцин кимлигини биламан, аммо у ҳақда тўлиқ маълумотга эга эмасман, қизиқмаганман ҳам. Муҳими, исмим ёқади. Ўзи Ельцин исмини отам танлаганми ёки онам - бунисини ҳам билмайман. 

— Сизга Россия клубларидан таклифлар тушмаганми?

- Ҳозирча йўқ. Лекин қайсидир жамоа менга ўз эшигини очса, тайёрман. Чунки Россиядек гўзал ва чиройли мамлакатда ўйнаш ўзгача тажриба бўларди. Қолаверса, билишимча, Россияда бинойидек чемпионат ва кучли клублар бор. Хуллас, у ерда ўйнаш имкония­тини мамнуният билан қабул қилардим.

- Россия термаси Қатар-2022га бормади. Бу масалада нима дея оласиз?

— Россия термаси муносиб футболчиларга эга эканлигидан хабарим бор. Лекин Европада рақобат баланд, кучли терма жамоалар жуда кўп (афтидан, Ельцин Россия термаси саралашдан четлаштирилганини билмайди).

- Россия сафаридан қандай таассуротлар қолган?

— Россияга ЖЧ-2018 стартидан вақтлироқ ташриф буюргандик, чунки жамоамизнинг ўртоқлик учрашувида майдонга тушиши режалаштирилганди. Ажойиб мамлакат, фақат бироз совуқлигини айтмаганда.

- Коста-Рика термаси немисларга қарши учрашув давомида «плей-офф»га чиқиш учун реал имконият ҳосил қилди. Ўша паллада қандай ҳолатга тушдинглар?

- Сўз билан ифодалашим қийин. Бутун жамоа шуни хоҳлаганди. Ўйин тугашига 13 дақиқа қолганди, бизда яна имкониятлар юзага келди. Фақат якуни ўхшамади, афсусдаман...

- Мануэль Нойердек кипер дарвозасига тўп киритганингизда, нимани ҳис қилдингиз?

- Ўзимни йўқотиб қўйишимга сал қолди. Одатда унча кўп гол урмайман, жаҳон чемпиони саналган Германия термаси дарвозасини нишонга олиш, яна мундиалда... Тўғриси, бундай гол ҳар қандай футболчига алоҳида завқ бағишлайди.

— Қатар-2022 сиз учун 3-мундиал бўлди. Энди тўртинчи турнирда ҳам қатнашишни режалаштираётгандирсиз...

- Албатта. Бу йўлда қаттиқ ишлаш, ўйинчилик сифатларимни яхшилаб боришга тайёрман. Худонинг ўзи жамоамиз билан 4-жаҳон чемпионатига чиқишимда ёрдам беришидан умидворман.

- ЖЧ-2022даги энг мураккаб ва яхши ўйинлар...

- Ҳар қандай ўйин олдидан бироз асабийлик кузатилади. Ахир ЖЧда сайёрамизнинг энг кучли жамоалари ўйнайди. Стартда Испания термаси дарвозамизни 7 марта нишонга олди - жуда оғир кун. Японлар анча тезкорлар, Германия термаси эса жисмоний жиҳатдан кучли. Хуллас, Қатарда бир-биридан мураккаб рақиблар билан тўқнаш келдик. Тушуниш керак, бундай гуруҳдан «плей-офф»га чиқиш осон эмас. Эҳтимол, бошқа квартетга тушганимизда, якун ўзгача кўриниш олармиди?

- Сизнингча, жорий жаҳон чемпионатида қайси жамоа ғалаба қозонади?

- Буни ҳеч ким билмайди. Кучли ва муносиб жамоалар кўп. Масалан, менга Франция термаси услуби ёқади. Бразилия жамоаси ҳам ўта даҳшатли. Ўйлайманки, шу иккисидан бири ғалаба қозонади.

МУҲАММАДХОН тайёрлади