Франко Барези: «Аввало, халқаро натижаларни яхшилаш керак»

Нафақат «россонерлар», балки бутун футбол тарихида ўчмас из қолдирган италиялик афсонавий ҳимоячи Франко Барези айни пайт клуб фахрий вице-президенти мақомида фаолият юритмоқда. Унинг фикрича, «Милан» энди халқаро нуфузини тиклашга эътибор қаратиши керак.

Мавсум-1984|1985  воқеалари 

- Ўша мавсумни жуда яхши эслайман - Нильс Лидхольм 5 йиллик танаффусдан ке­йин клубга қайтганди. Умуман, мавсум давомида нафақат ўйинимиз ўзгарди, балки фикрлашимиз ҳам. Дейлик, ҳудудий ҳимоя услубига таяна бошладик. Айни шу чизма тақдиримизга муҳр босди. 

16 ёшли Паоло  Мальдинининг дебюти

- Паоло ҳам Лидхольм интуи­цияси исботи. Мальдини бирданига клубга керакли хислатларга эгалигини кўрсатишга тушди. 1985 йилнинг январида «Удинезе»га қарши кечган ўйиннинг иккинчи ярмида майдонга тушган йигитча якунда клуб тарихидаги энг буюк футболчилардан бирига айланди.

Фикайо Томорига баҳо

- Бугун ҳужумни ҳимоячилар бошлашади ва бу ўйин сифатини яхшиламоқда. Томори? У ҳаммани ҳайратда қолдирди. Келиши билан кимлигини исботлади. Айниқса, ҳужумчилар билан яккама-якка курашишни қойиллатмоқда.

Сандро Тоналига баҳо

- Сандро - камтарин ва иқтидори баланд футболчи. Тўғри, бошида муаммоларга дуч келгандир, лекин ўз устида кўп ишлади ва ҳозир жанговар руҳият, клуб қадриятларини намойиш этишда барчага намуна бўлмоқда. Тонали «Милан» учун келажак нуқтаи назаридан ўзига хос бошланғич нуқтага айланиши мумкин. «Ми­лан»да италиялик ёшларни кўриш ҳар доим ёқимли. 

Рафаэль Леау ва Златан Ибрагимовичга баҳо

- Рафаэль анча кучайди, барқарор футболчига айланди. У ҳали янада юқорироқ даражага кўтарилиш салоҳиятига эга. Златанга келсак, у нафақат майдон, балки таш­қарида ҳам муҳим роль бажаради. Ибра - кийиниш хонасида жамоага ишонч бағишловчи куч. Тўғри, ҳозир ёш эмас, лекин майдонга тушса, фойда келтиради, барибир.

Стефано Пиолига баҳо

- Пиоли оғир паллада, айниқса, пандемия даврида ки­йиниш хонасида жамоавий муҳитни барқарор ушлаб турди. Менимча, Стефано хотиржамлик ва футболчилар билан муносабат ўрнатиш бобида Карло Анчелоттига ўхшайди. Янги мавсумга скудетто соҳиби мақомида тайёргарлик кўряпмиз. Мана, ЧЛга қайтдик ва энди халқаро натижаларни ҳам яхшилашимиз керак. Мавсум ўртасида ЖЧ бор, бунга ҳам тайёр туриш талаб этилади. Ахир жамоамизда Қатарга борадиган футболчилар кўп.

М.ПЎЛАТОВ тайёрлади