ФУТБОЛ ВА МОЛИЯ: ЕЧЛсиз ҳаёт шунақа бўлади

Мавсум-2016|2017да жамоа Deloitte Football Money League рейтингида биринчи ўринни эгаллаганди (676,3 млн. евро даромад) - 2020|2021 якунларига кўра, 5-поғонага шўн­ғиди (558 млн.).

Мабодо, «Юнайтед» янги молиявий йилда позициясини йўқотмаса, кейингисида аниқ «чўкиши» аниқ - клуб Чемпионлар Лигаси орқали келадиган ёғликкина мукофотлардан мосуво.

Жорий мавсум «МЮ» ЧЛда минимум 52 млн. фунт ишлади. Солиштириш учун: Европа Лигаси ғолиби «Айнтрахт»нинг мукофот пули 21,7 млн. евро (18,4 млн. фунт)ни ташкил этди. Тўлиқ молиявий тақсимот йўқ, аммо биз клубнинг жорий ва ўтган мавсум ўртаси - 1 июлдан 31 декабргача бўлган даврдаги расмий ҳисоботларини солиштиришимиз мумкин. Улар ичида икки жиҳат алоҳида эътиборга молик:

*** Роналдунинг футболкаси сотувидан 400 триллиард (исталган суммани ёзинг) ишлангани - сафсата. Бу - юлдузларнинг фамилияси уларнинг трансфери ва маоши учун сарфланган пулларни оқлаш учун етарли эмаслигига яна бир мисол.

*** 2021 йилнинг иккинчи ярмидаги «матчдэй» ва клубнинг умумий даромади ошган, лекин бу «МЮ»нинг харажатларидан даромадлари ортиқлигини англатмайди.

Сабаб - трансферлар ва маош фондининг кенгайгани. Кварталлар ўртасидаги солиштирувлар кўрсатмоқдаки, йилнинг биринчи чорагидаги маошлар харажати 71,9 (йилига 287,6) млн.дан 88,5 (йилига 354) млн.гача - бир йилда 23,1 фоизга ошган! Клуб энди Чемпионлар Лигаси ўрнини қоплаш учун шу билангина чекланади.

Daily Mail хабарига кўра, «Брайтон»га 0:4 ҳисобида имконият бой берилгач (шу учрашувдан кейин «МЮ» ЕЧЛга чиқишдан батамом маҳрум бўлганди), айрим юлдузларнинг шартномаларидаги бандлар фаоллашди - Де Хеа ва Роналду билан боғлиқлари маълум: испаниялик кипер ва португалиялик ҳужумчининг маоши 25 фоизга қисқаради. Яъни, клуб икки юлдуздан 11 млн. фунт тежайди. Бунақаси мавсум-2018|2019 якунида («Манчестер Юнайтед» 6-ўринни эгаллаганда) ҳам кузатилган: маошлар қисқариб, келгуси йил яна аввалги ҳолига қайтганди.

Энг кўп пул оладиган футболчилар маошини қисқартириш - харажатларни камайтиришнинг ягона чораси эмас. Якунланган мавсумда деярли майдонга тушмаган 6 футболчи ёзда «МЮ»ни эркин агент мақомида тарк этишади. Етакчилар маошининг қисқариши ва Погбанинг кетиши орқали жамоа қарийб 60 млн. фунтни тежайди - бу «қизил иблислар»нинг еврокубоклар жорий мавсумида ишлаб топган пулидан кўпроқ демакдир.

«МЮ»даги маошлар бўйича топ-ўнликда келгуси мавсум сезиларли ўзгаришлар кузатилади. Жамоани тарк этадиган Хуан Мата ҳам шулар жумласидан: испаниялик футболчи ҳафтасига 160 минг ёки йилига 8,3 млн. фунт ишлаб топарди. Шунингдек, сотилиши деярли аниқ бўлиб улгурганлар ҳам йўқ эмас - улар орасида ҳафтасига 250 минг фунт оладиган Антони Марсьяль бор. Рўйхатдагилардан яхшигина жамоа тузса бўлади.

«МЮ»нинг ортиқча юклардан қутулиши аниқ. Энди олдинда энг қийини бор - янги дахмазалар билан шартнома имзоламаслик.

А.АҲМЕДОВ тайёрлади