НИГОҲ: «Оғзидаги ош»ни олдирган омадсизлар

Саҳифамиз қаҳрамонлари - бутун мавсум давомида муваффақиятли тўп суриб, бирор марта чемпионликка эриша олмаган, баъзан сўнгги беллашувда ғолибликни бой берган юлдузлар.

Марко РОЙС (14 мавсум)

Бундеслиганинг якуний туридан кейин Марконинг кўзларидан қуйилган кўз ёшларини тушуниш жуда осон. Лекин Терзичнинг мутлақо аҳамияти бўлмаган ўйинда майдонга тушадиган «Майнц»га қарши тайёргарликни барбод қилганлигини тушуниш жуда қийин. Ғалаба қозонган тақдирда «Боруссия Дортмунд» чемпионликни нақд қиларди, аммо биринчи бўлимда пенальтини голга айлантира олмагани камлик қилгандек, ўз дарвозасидан иккита тўп ўтказиб юборди. Жамоа шунчалик савиясиз ўйнадики, фақат қанотлардан тўп узатиш билан кифояланди ва Рейна майдонга тушганидан кейин бир оз жонлангандек кўринди. Немис футболининг энг иқтидорли ўйинчиларидан бири бўлган Марко Ройснинг шу пайтгача совринсиз қолаётгани ўта ачинарли ҳол. Боз устига, у ўта омадсиз футболчи, арзимаган жароҳат туфайли жаҳон чемпиони унвонини қўлдан чиқарди, бўлажак «Спартак»­чи Шюррле эса бу имкониятдан унумли фойдаланди.

Антуан ГРИЗМАНН (13 мавсум)

Футбол иккинчи имкониятни бера оладиган видеоўйин эмаслигини Антуан тушуниб етди. У фақат бир марта «Реал Сосьедад» билан Сегундада ғолиблик лаззатидан баҳраманд бўлди. Бироқ унинг завқи ўзгача, элитадагидек эмас. У «Атлетико»ни тарк этди, жамоа эса «Ливерпул»дан кейин «Барселона» билан омадсизлик иллатидан фориғ бўлган Суарес билан шоҳсупага кўтарилди. Каталонияда Антуан чемпионликка эриша олмади, у «Атлетико»га қайтгач, «Барса» чемпионликни қўлга киритди. Аламли жиҳати шундаки, жаҳон чемпиони унвонини қўлга киритган, мундиаллардаги ва «Атлетико»даги баҳорги ўйинлари билан энг яхши ўйинчилар сафида зикр этилган футболчи ички чемпионатда чўққини забт эта олмади. Симеоне Дешамнинг Гризманни эркин мусаввирга айлантириш ғоясини қўллаб-қувватлагани ҳам самара бермади.

Антонио Ди НАТАЛЕ (14 мавсум)

Даниэле Де Росси фахрийлик даврида чемпионлик орзусини рўёбга чиқариш мақсадида Аргентинага йўл олганди. «Бока Хуниорс» бу вазифани уддалаб, Россини мамнун этди. Антонио эса Италия терма жамоаси билан чемпионлик чанқоғини қондира олмади - Евро-2012 турнирининг финалида «Скуадра Адзурра» Испанияга имкониятни бой берди. Ди Натале иқтидорли ҳужумчи бўлсада, узоқ вақтгача уни муносиб қадрлашмади. Натижада «Эмполи» тарбияланувчиси ўз фаолиятини қуйи дивизионлардан бошлади, кейин «А» сериясида совринсиз серияни давом эттирди. Чунки у камтарин «Удинезе» таркибида тўп сурганди. Мантиқан тўғри қарор, аммо ачинарли якун.

Харри КЕЙН (11 мавсум)

Агар Артём Зюба қаттиқ ишонадиган ўзга сайёраликлар учиб келишса ва Ер сайёрасидаги энг оммавий спорт тури ҳақида сўрасалар, Кейннинг нима учун совринларсиз қолганини тезда тушуниб оладилар. АПЛда қарийб 13 йил тўп сурган ҳужумчи «Норвич»даги 1-2 учрашувни ҳисобга олмаганда, «Тоттенхэм»да ўйнади. Ҳатто у маълум муддат ижарада тўп сурган «Лестер» ҳам чемпион бўлишга улгурди. У эса ҳамон совринсиз. Агар Кейн АПЛдаги фаолиятини давом эттирса, турнир тарихидаги энг яхши тўпурар унвонини Ширердан тортиб олиши мумкин. Лекин чемпионлик бобида унга ета олмайди - Алан «Блэкберн» билан чўққини забт этган.

Лоренцо ИНСИНЬЕ  (11 мавсум)

Гамшик Туркияга йўл олди ва «Трабзонспор» билан чемпион бўлди. У номдор жамоалардаги омадсиз афсоналар рўйхатини тарк этди. Европа чемпиони бўлмиш Инсинье эса энди яқинлашмоқда. У асосий вақтини қуйи дивизионларда ижарада ўтказди, «Наполи» бир неча бор совринга яқин келган бўлсада, Скудеттони Лоренцо «Торонто»га ўтиб кетганидан кейин расмийлаштирди. МЛС клуби эса ғолибликдан жуда йироқда.

Фернандо ТОРРЕС (17 мавсум)

Торресга оид ҳужжатларда унинг «Ливерпуль» билан Анг­лия вице-чемпиони бўлгани қайд этилган. «МЮ» мухлислари ҳам уни киноя билан тилга олишади. Испания билан жаҳон ва икки карра Европа чемпиони бўлган ҳужумчи «Атлетико» ва «Челси»да зафар қуча олмади, «Милан» ва «Ливерпул»даги уринишлари ҳам самара бермади. Ҳозир Фернандо «Атлетико» ўсмирлар жамоасини бошқармоқда, «Реал»га қарши дерби баҳсида ўйиндан четлатилди. Хайриятки, Эль Ниньо ўз даврида «Челси» билан ЕЧЛ ва ЕЛда зафар қучганди.

Стивен ЖЕРРАРД  (19 мавсум)

Рўйхатимиз қироли. Қарийб 20 йил чемпионлик ортидан қувди, аммо ета олмади. Фаулер, Хассельбайнк, Каррагер ва Ле Тиссье каби афсоналарга ҳам Англия чемпионлиги армон бўлиб қолган. Шунингдек, Сократес, Бэнкс, Мур ва Мэтьюзлар ҳам. Уларнинг кўпчилиги бу «иллат»дан клубни ўзгартириш эвазига фориғ бўлдилар. Тони «Бавария»да орзусига эришди, ван Перси «МЮ»да. Давид Де Хеа ҳам Робин билан муваффақиятга эришди. Омадсиз Хунтелар «Аякс» сафида,  Занетти «Интер»да ғолиб чиқди. Лекин салмоқли рўйхат ҳаётнинг доимо адолатли бўлавермаслигини эслатиб туради. Лекин омадсизлик ёнида омад ҳам йўқ эмас. Яқинда Кингсли Коман топ-чемпионатлар бешлигида биринчи бўлиб қаторасига 11-марта шоҳсупага кўтарилди. 27 ёшли футболчи фаолиятини 16 ёшда «ПСЖ»да бошлаган ва икки марта ғолиб чиққан, кейин «Ювентус» билан икки марта тенгсиз бўлганди. Энди Бундеслигадаги драматик ечимдан кейин «Бавария»даги 8-совринни расмийлаштирди. Гризманн бундай қила олмайди, Хуан Мата имконият қидирмоқда, ҳозир унинг «Галатасарой»и Туркияда пешқадам бўлиб олди. Бу ёғига жамоа «Боруссия Д.»нинг хатосини такрорламаса, бўлди.

Содиқ СОБИР тайёрлади