ОЧЛ чорак финалида қайси клуб кўпроқ ўйнаган?

Жумладан, «Ал-Ҳилол» ОЧЛ тарихида 9-марта чорак финал иштирокчисига айланибди. Лекин бу борадаги рекорд бошқа клубга тегишли.

*** 

Грузиялик бир дўстим қўнғироқ қилиб, гўшакни Осиёда мусобақалар қандай ўтказилишига қизиқаётган танишига узатди. У эса дарҳол саволлар бера бошлади:

- Мана, сизларда июнь ойида Осиё кубоги...

- Йўқ, Осиё кубоги январга кўчирилди.

- ОФК Осиё кубогига футболчи юборадиган клубларга қанча тўлайди?

- Бир тийин ҳам тўламайди. Пул тўлайдиган бу ФИФА, ЖЧдаги иштирок учун.

- УЕФА ҳам тўлайди.

- ОФК эса тўламайди.

- Бу йил сизларда ЖЧ саралаш турнири бошланади. Унда футболчилари қатнашадиган клубларга қанча тўланади?

- Уларга ҳам ҳеч ким тўламайди.

- УЕФА тўлайди-ку.

- УЕФА - бой ташкилот, бунга қурби етади. ОФКда бундай пул йўқ.

Шу суҳбатдан сўнг ўйланиб қолдим: Россия футбол иттифоқи ОФКга кўчиб ўтса, рус футболи жамоатчилиги Осиё-даги ҳаётнинг ўзига хос хусусиятларидан грузиялик дўстимнинг танишидан кам ҳайратланмаса керак. Масалан, ОФКнинг мураббийлик дипломи УЕФА томонидан тан олинмайди. ОЧЛда эса қитъанинг барча мамлакатлари клублари ўйнамайди ва ҳоказо...

***

ОЧЛ финалига «Шарқ» минтақасидан чиққан жамоа августдаёқ маълум бўлганди - «Урава Ред Даймондс». Бу клуб ўтган мавсум ички турнирларда ОЧЛда бўлгани каби муваффақиятли қатнашмади. Ҳозирги ҳолатда «Урава» учун ОЧЛнинг янги мавсумида иштирок этишнинг ягона йўли - қитъа мусобақасида ғалаба қозониш. Тўғри, Европадагидан фарқли ўлароқ, Осиёда ЧЛ ғолиби гуруҳ босқичи эмас, «плей-офф» раундидан старт­га чиқади ва бунда мамлакат квотаси ҳам ўзгармайди. Шундай экан, агар «Урава» ОЧЛ ғолибига айланса, «Санфречче Хиросима» турнирдан мосуво бўлади. 

*** 

Мана, ОЧЛ «Ғарб» минтақаси чорак финалчилари аниқланди:

«Дуҳайл» (Қатар)

«Ал-Шабаб» (С.Арабистони)

«Фулад» (Эрон)

«Ал-Ҳилол» (С.Арабистони)

«Ал-Ҳилол» 9-марта ОЧЛ чорак финалига чиқди. Бу турнир тарихидаги иккинчи юқори натижадир. Фақат «Чонбук Хюндай Моторс» чорак финалга кўпроқ чиққан - 10 марта. Саудиянинг бошқа гранди - «Ал-Иттиҳод» эса турнир чорак финалида 8 марта ўйнаган. «Ал-Ҳилол» эса бошқа икки рекордга эга: 6та ярим финал ва 4та финал (Япониянинг «Урава» клуби ҳам 4-финалга шайланмоқда). «Дуҳайл» ва «Ал-Шабаб» эса чорак финалда 4-марта ўйнаса, «Фулад» бу раундга биринчи марта йўл олди.

***

ОЧЛ «Ғарб» минтақаси чорак финал ўйинларидан олдин мамлакатларнинг клублар рейтингидаги ҳолатига назар ташласак, кун тартибида битта савол бор: Эрон рўйхатда Қатардан ўзиб кета оладими? Бунинг учун «Фулад» Қатарнинг «Дуҳайл» клубига нисбатан икки раунд узоққа бориши керак. Яъни Эрон рейтингда 2-ўринга қайтиши учун Қатар вице-чемпиони чорак финалда енгилиши, «Фулад» эса финалга чиқиши керак.

Алишер НИКИМБАЕВ, «Футболиум»