РЕЙТИНГ: Украина чемпионатига қалин муҳр

Яқинда украиналик ҳамкабларимиз Украина элит лигаси тарихини варақлаб, ҳозирда УПЛ (Украина Премь­ер-лигаси) номини олган чемпионатда энг кўп гол урган футболчилар рейтингини қайта ҳавола қилди. Биз учун ёқимли томони шуки, 1992 йили йўлга қўйилган Украина миллий лигаси тўпурарлар рўйхатини ҳамон терма жамоамиз собиқ ҳужумчиси Максим Шацких бошқариб турибди - Ўзбекистон футболидан қалин муҳр. Умуман, УПЛ тарихида атиги 6 нафар футболчига 100та гол маррасидан ошиш насиб этган, холос. Ҳамиша евростандартларга мос иқтидорларни кашф этиши билан ажралиб турадиган лига тўпурарлари рўйхатида Ўзбекистон футболи вакили пешқадам эканлиги ёқимли, албатта.

Рақамларга тўхталсак, Максим Шацких ҳисобида Украина юқори дивизионида расмийлаштирилган 124та гол бор. «Пахтакор»нинг амалдаги бош мураббийи шундан 97тасини қадрдон клуби - Киев «Динамо»си либосида нишонлаган. Макс шунингдек, «Арсенал»да 22та ва «Говерла»да 5та гол муаллифига айланган. Украина чемпионати тарихидаги энг яхши тўпурарлар рўйхатининг 2-поғонаси машҳур Сергей Ребровга тегишли. Афсонавий Андрей Шевченко сафдоши ҳам­юртимиздан атиги 1та гол даражасида орқада. «Шахтёр»даги фаолиятида рақиблар дарвозасини 10 марта нишонга олган Ребров «Динамо» либосида 113та гол тўплаган.

Айтиш керак, голеадорларнинг кучли 10талигидан жой олган футболчилардан атиги 2 нафари профессионал фаолиятини давом эттирмоқда. Гап Андрей Ярмоленко (105та гол) ва Александр Гладкий (99та гол) ҳақида кетмоқда. Бунга қадар Германия, Англия ва БАА чемпионатларида ўйнаб қайтган 34 ёшли Ярмоленко ҳозир жонажон жамоаси - «Динамо»да. 36 ёшли Гладкий эса УПЛ чегараларидан четда - у қуйи лига иштирокчиси «Авангард»да нафақага ҳозирланмоқда. Хуллас, етакчилик яқин орада Шацких қўлидан чиқмайди.

Украина чемпионати элит лигаси тарихидаги энг яхши тўпурарлар

1. Максим Шацких  - 124та гол («Динамо» К. - 97та, «Арсенал» - 22та, «Говерла» - 5та)

2. Сергей Ребров  - 123та гол («Шахтёр» - 10та, «Динамо» К. - 113та)

3. Евгений Селезнёв - 116та гол («Шахтёр» - 24та, «Арсенал» - 19та, «Днепр» - 68та, «Колос» - 5та)

4-5. Андрей Ярмоленко - 105та гол 

(«Динамо» К. - 105та)

  4-5. Андрей Воробей - 105та гол 

(«Шахт­ёр» - 80та, «Днепр» - 12та, 

«Арсенал» - 9та, «Металлист» - 4та)

6. Жуниор Мораес - 102та гол («Динамо» К. - 22та, «Металлург» Д. - 35та, «Шахтёр» - 45та)

7. Александр Гладкий - 99та гол 

(«Металлист» - 1та, «Харьков» - 14та, «Шахтёр» - 41та, «Днепр» - 2та, «Карпати» - 23та, «Черноморец» - 3та, «Заря» - 15та)

8. Александр Гайдаш - 95та гол 

(«Таврия» - 85та, «Мариуполь» - 10та)

9-10. Марко Девич - 90та гол («Волинь» - 2та, «Шахтёр» - 4та, «Металлист» - 84та)

   9-10. Сергей Мизин - 90та гол («Динамо» К. - 16та, «Днепр» - 8та, «Черноморец» - 2та, «Карпати» - 25та, «Кривбасс» -  7та, 

«Металлист» - 8та, «Арсенал» - 24та)