Яҳё Жабран – собиқ футзалчи!

Фахрий футболчи ўз фаолияти давомида атиги бир мавсумни Марокаш чемпионатидан ташқарида, БААда ўтказгани боис, кўпчилик мухлисларга таниш эмас. Бироқ Яҳё нафақат эслашга, балки фахрланишга арзийдиган натижаларни қайд этган ярим ҳимоячи. Масалан, у Марокаш футзал терма жамоасининг ЖЧлари тарихидаги дастлабки голи муаллифидир. Қуйидаги ҳикоя ана шу «соядаги» қаҳрамон ҳақида.

Маълум бўлишича, 2012 йилда Таиланд мезбонлигида ўтган футзал бўйича ЖЧда илк бор иштирок этган Марокаш терма жамоаси старт беллашувида Панама билан куч синашган, Яҳё Жабран ўйиндаги ҳисобни очганди. Тез орада унинг жамоадошлари ҳисобдаги фарқни учтага етказишган бўлсада, якунда учрашув 8:3 ҳисобида Панама фойдасига ҳал бўлганди. Кейинги турларда Марокаш аввал Эрон терма жамоасидан минимал (0:1), Испаниядан 1:5 ҳисобидаги мағлубиятларни қабул қилиб олди ва ўз гуруҳида 4-ўринни эгаллаб, мусобақани барвақт тарк этганди. Дарвоқе, ўша турнирда Россия терма жамоаси ўз гуруҳидан умумий 27:0 ҳисобидаги ғалабалар эвазига 1-ўрин билан плей-офф босқичига чиққан, чорак финалда Бразилияга имкониятни бой берганди.

Орадан 4 йил ўтгач, Марокаш яна гуруҳ босқичидан чиқа олмади - Испаниядан 4та, Озарбайжон ва Эрон терма жамоаларидан 5тадан гол қабул қилиб олди. Фақат шундан кейин футзал терма жамоасида муваффақиятли давр бошланди - жамоа охирги иккита Африка Кубоги турнирида ғолиб чиқди, 2021 йилдаги ЖЧда эса чорак финалга чиқиб, ягона гол эвазига Бразилияга имкониятни бой берди. Ҳозир Марокаш футзал терма жамоаси жаҳон рейтингида 8-ўринда бормоқда.

11 ёшида қурилишда ишлади, 21да катта футболга ўтди, 31да мамлакатнинг энг яхши футболчисига айланди

Марокаш футзалининг тарихий ғалабалари Жабраннинг иштирокисиз қўлга киритилди - у 2012 йилда профессионал жамоага ўтиб, катта футболдаги фаолиятини бошлади.

Яҳё Жабранга оид қисқача маълумот:

**  Мактабда яхши ўқиган Яҳё 11 ёшидан бошлаб қурилишда ишлаш орқали шахсий харажатлари учун пул топа бошлади;

**  Жабран 5 йил шаҳар жамоаси таркибида Марокашнинг 3-дивизионида тўп сурди, параллел равишда футзалга ҳам бриб турди. 21 ёшида профессионал жамоа сафидан жой олди;

**  Яҳё - таянч ярим ҳимоячиси, лекин ҳимоя марказида ҳам ўйнай олади;

**  «Видад» - Марокаш футболининг энг совриндор клуби. Жабран бу жамоа таркибида 3 марта чемпионликка эришди, сўнгги АЧЛда ғолиб чиқди;

**  Жабран 2 марта Марокаш терма жамоаси билан Африка Миллатлар Кубогида зафар қучди (турнирда фақат ички чемпионатларда тўп сурадиган ўйинчилар иштирок этадилар);

**  2019 йилда ҳакамнинг майдондан четлатганига чидай олмаган Яҳё унга тупуриб юборди - шу сабаб, жарима тўлаб, 6та ўйинни ўтказиб юборди. Ҳозир Жабран Марокаш чемпионатида сўнгги мавсумнинг энг яхши ўйинчиси.

Яна Зиеш қайтди, Ҳакими ва Мазрауилар сафда, ал Носири ҳамиша гол уришга шай

Қатар мундиалига йўл олган Марокаш терма жамоасининг таркиби анчайин қизиқарли, ундан «Севилья» «ПСЖ», «Бавария», «Марсель», «Фиорентина», «Челси» вакиллари жой олишган:

**  «Удинезе»нинг чап қанот ҳимоячиси Адам Мазина жароҳат туфайли узоқ муддатга сафдан чиққан, ҳимоя чизиғи қанотларида Ашраф Ҳакими ва Нуссаир Мазрауилар тўп суришмоқда. Марказда уларга Найеф Агерд ва Ромен Саисслар кўмаклашмоқдалар. Ярим ҳимояда эса Софьян Амрабат ва Амин Харит;

**  Ҳаким Зиеш қайтди. У Воҳид Халилходжич билан келиша олмаётганди, мураббий алмашгач, терма жамоадан чорлов олди. Аввалги ЖЧ арафасида ҳам шундай вазият туфайли Эрве Ренар билан муроса қила олмаган Зиеш Африка Кубоги-2017 турнирини ўтказиб юборганди;

**  Абде Эззалзули шу йил аввалида АМК турнирида қатнашишдан бош тортган, Халилходжич бунда «Барселона»ни айблаганди. Ҳозир 20 ёшли ярим ҳимоячи «Осасуна»да ижара асосида тўп сурмоқда;

**  Юссуф ал Носири - олдинги чизиқнинг ишончли «тоғи». Унинг Калининградда урган голи Испания устидан ғалаба келтиришга жуда яқин турганди. Бироқ Аспаснинг голи умидни пучга чиқарганди;

** Ҳозир Марокаш терма жамоасини 47 ёшли марокашлик мураббий Волид Реграги бошқармоқда. 2000-йилларда у футболчи сифатида терма жамоа шарафини 45та учрашувда ҳимоя қилган, шу йилнинг майида эса Касабланканинг «Видад» клубини бош мураббий сифатида АЧЛ шоҳсупасига олиб чиққанди.

А.АБДУВАЛИХЎЖАЕВ тайёрлади.