«Арсенал» 2019 йилнинг декабридан бери мураббий алмаштирмади. Фақат биринчи мавсумда Артета узоқ вақт курашишни талаб этадиган соврин - Англия Кубогини қўлга киритди. Шундан кейин 2 марта битта ўйинли мусобақа - Англия Суперкубогида ғолиб чиқди. Қаторасига 3 марта жамоа АПЛда 2-ўринни эгаллади. Шундан кейин афсонавий Тьерри Анри Артетанинг танқидчилари сафига қўшилди.
Микель «Арсенал» афсонасини ҳасадгўйликда айблаши мумкин. Анри малакали мураббий бўла олмади. Француз Лондонда испаниялик касбдоши ўрнини боса олмайди. Балки ҳасаднинг қандайдир таъсири бордир, лекин Анри ўзининг мураббийлик даражасини яхши билади ва ўта бадавлат клубларга интилмайди. Лекин унинг эксперт мақомидаги эътирофида оқилона маъно бор:
«Арсенал» ҳафсаламни пир қилди, деган фикрдан йироқман. Бироқ ҳозир мухлислар жамоанинг иштирокига оид саволлар беришмоқда. Артета келган пайтда жамоа унга бегона эди. Мураббий кўзлаган ишларни амалга ошириш учун, камида 3-4та трансфер дарчаси талаб этилади. Ўзининг ғояларини рўёбга чиқариши учун, мураббийга вақт бериш лозим. Лекин охирги 3 йил ичида «Арсенал» ҳеч бўлмаганда битта соврин ёки улкан финалга эришадиган вазиятда эди. «МЮ» сўнгги 5 йил ичида 5та финалда тўп сурди. «Арсенал» эса 3 йиллик фаол ривожланиш даврида бирорта финалга чиқа олмади. Шундай экан, мухлисларнинг саволларини тўғри тушунаман: «Наҳотки Артетага соврин керак бўлмаса?»
Шунингдек, Анри диалогдаги Артетанинг чуқур мулоҳаза билан «Арсенал»ни қураётгани ҳақидаги бегона кимсанинг изоҳини ҳам моҳирона рад этди: «Микель қуряпти, янги қаватларни бунёд этмоқда. Лекин кўп қаватли бино кубоклар билан тўлдирилганми?»
Мазкур эътирофда нафсониятга тегадиган иборалар йўқ, лекин Артета Тьеррига нисбатан кек сақлаган бўлиши мумкин. Кейинчалик француз мулойимлашди ва позицияни аниқлаб олди. Аввалги мулоҳазалар танқид оҳангида эди. Энди Анридан «Арсенал»нинг баҳордаги омадсизликдан кейин чемпион бўлиши ёки бўлмаслиги ҳақида сўрашди. Эксперт эса қуйидагича жавоб қайтарди: «Менимча, Артета ўз вазифасини аъло даражада уддаламоқда. Албатта, уни ҳар қандай вазиятда ҳам ҳозир лавозимидан четлатиш керак эмас. «Арсенал»нинг янги мавсумда чемпион бўлишига ишонаманми? Ҳа. Ҳаммаси яхши бўлди ва бу ёғига янада яхши бўлиши шарт».
Бир ой ичидаги икки эътирофда зиддият йўқ. Артетани совринларга эга бўлмагани учун ҳақли равишда танқид қилинган. Микель беш ярим йилдан бери битта клубни бошқармоқда. АПЛнинг қудратли клуби мураббийи учун бу кўп. Клопп ва Гвардиоладан фарқли равишда, «Арсенал» устози ўз жамоасини Европа финалларига олиб чиқмади. Лондонликлар мутасаддилари учун АПЛ ғолиблигисиз байрам қиладиган мусобақа йўқ. Артетанинг шартномасини 2027 йилгача узайтирилди. Энди АҚШлик соҳиб ва талабчан мухлислар «тўпчилар» сардорини қўлларидаги қимматбаҳо соврин билан кўришни истайдилар.
Лойиҳа тўхтаб қолганлигини Кронке тушуниб турибди. Тасаввур қилинг, сиз - «Арсенал» соҳибисиз. Фантазиянинг парвози учун Стэн Кронке каби «Уолмарт» супермаркетлар империясининг меросхўри билан оила қуриш шарт эмас. Қайнота туфайли миллиардерга айланган куёв Лондондаги футбол лойиҳасига бўлган муносабатини ўзгартирди. Қурумсоқ Кронке Артетага трансфер бюджетини берди. 2020 йилнинг ёзида Микель клуб келишувлари назоратини ўз зиммасига олгач, фақат Манчестер клублари ва «Челси» ундан кўпроқ маблағ сарфладилар. Дьокерешнинг келиши миллиард евро маррасидан ўтиш имкониятини беради.
Энди ўзингизни Кронке ўрнига қўйиб, савол беринг: агар Артета янги мавсумда арзийдиган бирон-бир совринни қўлга кирита олмаса, мураббийлик лавозимида қолдириш керакми? Тўғри жавоб - керак эмас. «Тоттенхэм»да австралиялик Постеоглуни ЕЛдаги ғалабадан кейин истеъфога чиқаришди. «Шпорлар»нинг айрим мухлислари клуб соҳиби қизининг қарорини маъқуллашди. «Тоттенхэм» АПЛдаги зафарни янги мураббий Франк билан кутиши мумкин. Клуб учун улкан сармоялар сарфланаётган пайтда таркиб устидан шикоят қилиш адолатдан эмас.
«Арсенал»да маблағ янада кўпроқ, обрў-эътибори эса Салиба, Райс ва Эдегор даражасидаги футболчиларни жалб этиш учун етарли. Буёғига иродани жамлаб, Артетага бутун мавсум давомида шикоят қилишни тақиқлаш ва жамоани мавсумга тайёрлашни топшириш керак. Ҳозирда жамоа бир вақтнинг ўзида ЕЧЛ ва АПЛда талаб даражасида ўйнай олмаса керак, гарчи у «Челси» ва «Манчестер Сити»га нисбатан устунликка эга бўлса ҳам. Сабаби, «тўпчилар» КЖЧда толиқиб қолишмаган. «Ливерпуль» эса ака-ука Жотанинг даҳшатли фожиасини бошдан кечирди. «Арсенал»да эса «кузирлар» етарли. Дьокерешнинг заявкада пайдо бўлиши Артетани таркибда туғма снайпернинг йўқлигидан халос этади. Португалия лигасининг қироли АПЛда ўйнай олиш-олмаслигини ҳеч ким билмайди. Ҳар бир Роналду ва Брунуга Англияда ишлари юришмаган Фалькао ва Жардель топилади. «Спортинг» снайпери Мадуэке ва Субименди билан ҳамкорликда орзулар асосини яратади. Артета бу таркиб ортидан узоқ йиллар давомида йўл босди, директор Эдуга буйруқ берган ҳолда футболчиларни ўзи танлади. Ёзда спорт менежери Андреа Берта ҳам Артетага кўмаклашди.
Ҳозир «Арсенал» дарвозасини Кепа ва Райя қўриқлашмоқда. Улар бартараф этилган зарбалар бўйича АПЛнинг ўтган мавсумдаги биринчи ва учинчи дарвозабонлари. Жамоа лидери Габриэль лазаретдан қайтди, унинг шериги Салиба ҳам чакки эмас, француз Вильям «Реал»нинг нишонида. Тимбер ўнг қанотда Сака билан ҳамкорликда ўйнайди, чап қанотда навқирон Льюис-Скелли янги вингер Мадуэке билан ишлаш тараддудида. Ёки Артета яна бир ижодкорни олиш ниятидами? Ҳатто Родригога ҳам маблағ етади, гарчи бразилиялик «Реал»ни тарк этишга ошиқмаётган бўлса ҳам.
Хавбек Субименди эса Мадридни эмас, Лондонни танлади, асосий таркибда Партини алмаштиради. Райс ва Эдегор - жаҳон миқёсидаги ярим ҳимоячилар, ҳужумда эса Дьокереш шай. Захира ўриндиғида эса «Челси» ва «Сити»нинг собиқ ўйинчиларини топиш мумкин. Хаверц ёзда анча ҳаракат қилди, энди рақобатчиларидан ўйин амалиётини тортиб олишга уриниб кўради. Эҳтимол, Кай ҳужум чизиғининг чап қанотида тўп сурар. Бу ёқда Артета дарғазаб, унинг креслосига Европа чемпиони Мерино интилмоқда. Қисқаси, Анри ҳақ - «Арсенал» АПЛда ғолиб чиқишга қодир. Агар у совринсиз қолса, Артетани истеъфога чиқаришади.
Манба: soccer.ru, С.РАҲМОНОВ тайёрлади
