Футболчилик фаолиятидаёқ «Атлетико» тарихида ўчмас из қолдирган Диего Симеоне мураббийликда ҳам жамоа афсонасига айланиб улгурди. Зеро, аргентиналик мутахассис «матрасчилар»ни 14 йилдан буён узлуксиз бошқармоқда ва ортда қолган вақтда салмоқли ғалабаларга ҳам эришди. Тўғри, Симеоне дружинаси Клублар ўртасидаги ЖЧ-2025 гуруҳ босқичида аламли омадсизликка йўлиқди. Ваҳоланки, аргентиналик мутахассис шогирдлари гуруҳ раундидан ўтиб, «плей-офф»даги ҳар бир ўйинга финалдек муносабатда бўлишларини таъкидлаганди ФИФА расмий сайтига берган интервьюсида.
- Клублар ўртасидаги ЖЧ қандай таассурот қолдирмоқда?
- Афсуски, кенгайтирилган миқёсда илк марта ташкиллаштирилган турнир биз учун омадсиз бошланди. Таассуротларга келсак, турнир миллий жамоалар иштирокидаги ЖЧни эслатмоқда. Айниқса, Жанубий Америка ва Европа футболига хос хилма-хилликни битта мусобақада кузатиш, турли услубларга эга жамоалар ўйинини кўриш ўзгача завқ улашади. Мусобақа бошқа қитъалар футболини кўришга одатланмаган мухлислар учун ҳам қизиқарли туюлаётгани аниқ.
- Кўп йиллар давомида энг юқори даражада ишлаш учун руҳий тетикликни қандай сақлаб келяпсиз?
- Очиғи, ўйинимиз ривожланаётганини кузатиш менга иштиёқ ва энергия бағишлайди. Бундан ташқари, вазиятга мослашиш инстинктини яхши ўзлаштирганман. Майдонда клуб қадриятларини ўзида акс эттирадиган футболчилар масаласида ҳам омадим чопгани тайин. Қисқаси, «Атлетико» ҳамиша ривожланиш йўлидан боради ва бундай ёндашув исталган мураббийга мотивация сифатида хизмат қилади. Шу тариқа одам руҳиятида тетиклик ҳамда барқарорлик ҳисси барқ уради.
- Сиздан икки даҳо - ҳамюртларингиз Диего Марадона ва Лионель Месси ҳақида сўрамасликнинг иложи йўқ. Айтингчи, улар Аргентина футболи тарихида қандай ўрин тутишади?
- Марадона ва Месси ҳақида айтилмаган қандайдир эътироф ёки улуғвор сўзлар қолмаган бўлса керак. Улар шубҳасиз, дунё футболининг энг кучли буюк ижрочиларидир. Марадона билан «Севилья» клуби ва миллий жамоада бирга ўйнаш бахтига эришган кам сонли футболчилардан бириман. Бироқ Месси билан ишлаш ҳалигача насиб этгани йўқ. Лекин Леонинг аргентиналик эканлигидан чинакамига фахрланаман, албатта.
2011 йилнинг 23 декабрь куни «Атлетико» бошқарувини қўлга олган Диего Симеоне дебют мавсумидаёқ жамоани ЕЛда ғалаба сари етаклади. 2013 йилнинг 17 май куни эса «матрасчилар» «Эль-Чоло» бошқарувида Испания кубоги финалида «Реал»ни 2:1 ҳисобида енгишди. Мадриднинг иккинчи рақамли жамоаси бунга қадар 14 йил давомида «Қироллик клуби»ни бирор марта мағлуб этолмаганди. Яна 1 йилдан сўнг «Атлетико» ўз тарихида 10-марта Испания чемпиони бўлди ва ўша мавсум ЧЛ финалига ҳам чиқиб, азалий рақиби - «Реал»га имкониятни бой берди.
Манба: fifa.com, М.ПЎЛАТОВ тайёрлади
