Элдор Суюнов терма жамоа сафига қайтмоқчи

Унда футболчи “Нефтчи”даги ишончли ўйинлари билан яна терма жамоадан чақирув олмоқчилигини яшириб ўтирмади

 - "Нефтчи" клуби ҳақида нималарни биласиз? 

 - “Нефтчи” бой тариҳга эга жамоа. Водий халқи ҳаётида футбол қанчалар муҳим ва эътиборли эканлигини яхши биламан. Мухлислар футболни қанча яхши кўрсалар, футболчиларга нисбатан талаблари ҳам шунчалар қатъий. "Нефтчи" ҳақида кўп нарсалар биламан. Бу жамоа водийнинг етакчи клуби сифатида мамлакат чемпионати ва кубоги мусобақаларида беш марта чемпионликни ва Ўзбекистон кубогини қўлга киритган. 

 - Клубга келишингизга нималар сабаб бўлди? 

 - Энг асосий сабаб, жамоа олдига катта мақсадлар ва масъулиятли вазифалар қуйилгани. Мен бу вазифаларни бажаришда бутун вужудим билан иштирок этиб, "Нефтчи"нинг азалий пешқадамлиги ва ғолиблигини тиклашга муносиб ҳисса қўшиш, жамоанинг чемпионликни қўлга киритиш учун курашида фаол иштирок этиш ва Фарғонанинг етакчи футболчиси сифатида мамлакат терма жамоаси сафида бўлишдан иборат. Насиб бўлса бу йил мухлисларимизни совринлар билан ҳурсанд қилишга интиламиз. 

 - Мухлисларга айтар сўзингиз? 

 - Ўзбекистон футболи йилдан-йилга ривожланиб, юксак чўққиларни кўзлаб бормоқда. Бунда миллионлаб мухлисларнинг қўллаб-қувватлаши ва мадади муҳим роль ўйнамоқда. Шу боис мен мухлисларимизга бу йилги мусобақаларда ҳам бизни астойдил қўллаб-қувватлаб, руҳимиз ва маҳоратимизни юксалтиришда доимо мададкор бўлишларини истайман.