Қойил-ей, топқир Арне Слот!

Оддий айтганда, жорий мавсум Англия чемпионати юқори дивизионида чинакам тўполон кўтараётган «ўрмончилар» турнир жадвалида ишонч билан пешқадамлик қилаётган «қизиллар» олдида ҳам бош эгишмади. Камтарин жамоага тасанно! Шунингдек, «Ливерпуль» бош мураббийи Арне Слотга ҳам алоҳида тасанно айтиш жоиз. Нега, ахир унинг жамоаси ғалаба қозонолмади-ку... Гап шундаки, ўйиннинг 66-дақиқасида футболда жуда кам кузатиладиган ҳодисот рўй берди.

Хуллас, «Ливерпуль» бурчак тўпи тепиш ҳуқуқини қўлга киритгач, Арне Слот захирадан бирданига 2 нафар футболчини майдонга туширишни лозим топди. Яъни нидерландиялик мутахассис Эндрю Робертсон ва Ибраима Конатени тегишлича Константинос Цимикас ва Диогу Жота билан алмаштиришга қарор қилди. Кейин нима бўлди? Грециялик футболчи дарҳол бурчак тўпини амалга оширишга отланди, португалиялик эса жарима майдони ичига югурди. Қарангки, Цимикас узатмасидан кейин айнан Жота ҳисобни тенглаштирди. Оддий айтганда, ўйинга захирадан қўшилган ҳар икки футболчи тўпга биринчи тегинишдаёқ самарали ҳаракат муаллифига айланди. Шу тариқа АПЛ тарихида захира вакиллари томонидан қайд этилган энг тезкор «Гол+пас» кузатилди. Ҳа, буни шунчаки, вазият тақозосига йўйиш мумкин. Лекин факт шуки, Арне Слот айнан бурчак зарбаси олдидан иккилик алмаштиришга қўл урди ва футболчилардан бирини байроқча томон йўналтирди. Демак, бу ҳолатда мураббийни топқирликда олқишлаш учун асос етарли.

Дарвоқе, Диогу Жота захирадан майдонга тушганидан атиги 22 сония ўтиб, «ўрмончилар» дарвозасини ишғол қилди. Squawka маълумотига қараганда, у шу аснода «Ливерпуль» тарихида АПЛ ўйинида захирадан тушиб, энг тезкор гол урган футболчи бўлди (ушбу статистика мавсум-2006/2007-дан эътиборан юритилаётганини қўшимча қилиш жоиз).