Мурат Якин: «Швейцария футболи катта ресурсга эга»
Яқин ўтмишнинг кўзга кўринган футболчиларидан бири Мурат Якин 2021 йилнинг август ойидан буён Швейцария миллий жамоаси бош мураббийи лавозимида ишлаб келмоқда.
Таниқли инсайдер Иван Карповнинг хабарига қараганда, Россиянинг гранд клублари 17 ёшли ҳимоячи Азиз Тўлқинбековни кузатмоқда. Гап «Спартак», «Зенит» ва ЦСКА клублари ҳақида кетмоқда. Универсаллиги билан ажралиб турадиган Тўлқинбеков - «Бунёдкор» академияси тарбияланувчиси. Амплуа бўйича марказий ҳимоячи саналган футболчи ўнг қанот ҳимоячиси ва таянч ярим ҳимоячи ролида ҳам ўйнай олади. The Guardian нашри дунёнинг 18 ёшгача бўлган энг иқтидорли 60 нафар футболчиси қаторига ҳамюртимизни ҳам киритганди. Қолаверса, Transfermarkt портали яқинда уни 16-17 ёшли мегаиқтидорлардан тузилган топ-10 шаклидаги жаҳон рейтингига қўшди. Азиз Ўзбекистон U-17, U-20, U-21 термаларида ўйнаб келмоқда. «Бунёдкор» сафида Ўзбекистон Суперлигасининг 17та ўйинида жами 1017 дақиқа ҳаракатланди. Мамлакат кубоги доирасида эса 4та учрашувда майдонга тушиб, ўз ҳисобига 1та гол ҳам ёздирди. Тўлқинбековнинг пойтахт клуби билан амалдаги шартномаси 2026 йилнинг 31 декабригача мўлжалланган. Ёш футболчининг трансфери 250 минг еврога баҳоланмоқда transfermarkt портали томонидан. Хуллас, football24.ru сайтида истеъдодли футболчимиз ҳақида алоҳида мақола берилди.
ИСТЕЪДОДЛАР МАКОНИ
Ўзбекистон сўнгги йилларда Европа, хусусан, Россия футболига катта истеъдодларни етказиб берувчи мамлакатга айланди. Мана, Аббос Файзуллаев ЦСКАда ёрқин ўйин намойиш этмоқда, унинг келажагини ҳатто «Бавария» билан боғлашди. Абдуқодир Ҳусанов эса «Ланс»да юқори даражада ўйнаб кетдики, уни «ПСЖ»дек жамоа сотиб олишни истаяпти. «Бунёдкор»да тарбияланган яна бир янги ёш юлдузча ҳам юқори марраларга интилмоқда. Азиз Тўлқинбеков «Зенит», «Спартак» ва ЦСКА клублари эътиборида турибди. 17 ёшли йигитча шу қишдаёқ Россия чемпионатига кўчиб ўтадими ёки ҳаммаси ҳали ёш ўзбекистонликка нисбатан эҳтиёткор қизиқиш?
15 ЁШДА ТЎЛАҚОНЛИ ДЕБЮТ ВА ЖЧ
«Бунёдкор» академияси Ўзбекистонда энг самарали футбол таълими даргоҳларидан биридир. Ёшгина Тўлқинбеков иқтидорини ҳам айнан шу академия юзага чиқарди. Клуб масаласида Азизнинг омади чопди. Ҳар ҳолда, у «Бунёдкор»да Ўзбекистон чемпионати тарихида Суперлига ўйинида дебютини нишонлаган энг ёш футболчига айланди. Бу воқеа 2022 йили «Қўқон-1912»га қарши кечган ғалабали ўйин (1:0)да кузатилди. Футболчи ўшанда 15 ёш 8 ой ва 28 кунлик эди! «Бунёдкор»даги омадли дебютдан кейин Тўлқинбековнинг фаолияти тобора ривожланди. Ёш ҳимоячи жумладан, ўсмирлар ўртасидаги жаҳон чемпионатига борди ва ўзини энг яхши хислатларини кўрсатди. У кичик мундиал доирасидаги 5та ўйинда ҳам тўлиқ вақт ҳаракатланди, Ўзбекистон ўсмирлар терма жамоаси эса чорак финалга чиқди ва бу раундда францияликларга ягона гол туфайли ютқазди.
мундиалдаги ЭНГ ЯХШИ ЎЙИН
Ўзбекистонлик ўсмирлар мундиалнинг 1|8 финалида Англия термасига қарши майдонга тушишди. Бунда Тўлқинбековнинг ўта ишончли ҳаракати мундиал фаворитларидан бирини 2:1 ҳисобида енгиш имконини берди. Рақамларда айтсак, Азиз учрашув давомида 7та яккукурашнинг 4тасида устун келди, яна тўп учун олишувда 3 марта ғалаба қозонди, бир бора зарба йўлига тўғаноқ бўлди. Жаҳон чемпионатидан кейин Тўлқинбековнинг ўйини бошқа ёш тоифасидаги терма жамоалар мураббийларини ҳам қизиқтириб қўйди. Шу тариқа Азиз жорий йил Ўзбекистон U-20 ва U-21 термаларида дебют қилди. У хусусан, 20 ёш тоифасидаги жамоани Осиё кубоги саралашидан муваффақиятли ўтишида жонбозлик кўрсатди - 3та ўйинда 2та гол ва 2та ассист. Ҳимоячи учун қойилмақом натижа.
«БУНЁДКОР»ДАГИ РИВОЖЛАНИШ
Ўзбекистон терма жамоаларидаги дадил қадамлар ва ривожланиш Тўлқинбековни «Бунёдкор»да ўз позициясини мустаҳкамлашга ундади. Ҳар ҳолда, 2 мавсум давомида Суперлига доирасидаги атиги 2та ўйинда кўриниш берган йигитча охиргисида 17 марта майдонга тушди! Оддий айтганда, майдонда жами 1017 дақиқа ҳаракатланди. Азиз замонавий футболчи учун ўта муҳим хусусиятга эга - универсал йигит. Ўзбекистонлик иқтидор 3та позицияда ўйнай олади: марказий ҳимоя, ўнг қанот ҳимояси ва таянч ярим ҳимоясида. Асосийси, Тўлқинбеков ёшига нисбатан анча совуққон, ўйинни яхши тушуниши ва тезкор равишда ҳужумга яхши қўшилиши билан ажралиб туради. Ёш истеъдод марказий ҳимояда ўйнашга қобилиятли саналсада, қанот ёки майдон марказида яхшироқ кўриниши мумкин. Чунончи, ёшини инобатга олсак, Азизбекда мушаклар ҳали тўлиқ мустаҳкамланмаган ва бу ҳимоянинг охирги нуқтасида панд бериши ҳеч гап эмас. Масалан, «Навбаҳор»га қарши ўйинга қўшиб берилган вақтда «иккинчи қават»даги курашда ютқазиши оқибатида унинг жамоадоши жарима майдонида қоида бузишдан ўзга чора тополмади. Рақиб эса пенальтидан фойдаланиб, очколарни илиб кетди.
РОССИЯ ГРАНДЛАРИНИ КУЧАЙТИРАДИМИ?
Ҳозирча Тўлқинбековни «Зенит», «Спартак» ва ЦСКАга таклиф қилишда шошилмаслик керак. Биринчидан, «Бунёдкор» вакилларининг айтишларича, ушбу клублар фақат қизиқиш билдирган, яъни офисга расмий хат юборилмаган. Иккинчидан, Азиз қандай иқтидорга эга бўлмасин, бир уринишда Россия грандини кучайтиролмаса керак. Дейлик, «Зенит» марказий ҳимоясида Барриос бор, унинг ёнида Мантуан ўйнайди, яна Караваев. «Спартак»да эса ўнг ҳимояда Денисовга тенг келадигани йўқ. ЦСКАда Келлвен ўнг қанотни ўзиники қилиб олган. Азизбек барчага керак. Лекин аввало, катта лигада ўйнаш учун пухта ўрганиши лозим. Тўлқинбековнинг ўз клуби асосий таркибида ўйнай бошлаганига кўп бўлмади. Қолаверса, асосан захирадан майдонга тушди. Бу эса 2 йил давомида фақат ёшлар даражасида ўйнаган йигитнинг кўтарилиши учун етарли эмас. Муҳими, унда ўсиш учун барчаси мавжуд. Азиз атиги 17 ёшда ва РПЛ томон шошилиши шарт эмас. Захира ўриндиғига «михланиш»дан кўра, майдонга тушиб тургани яхшироқ. Асосийси - катта клублар эътиборини тортиш. Тўлқинбеков эса бу қадамни аллақачон ташлади.
