Тимур Кападзе: “Ёшлар жамоасининг бир кун кейин ўйнаши мураббийларга қулай”

Эндиликда Ўзбекистон U-23 терма жамоаси ва Олимпик клуби собиқ устози Тимур Кападзе Лигага интервью берди. 

 “U-21 жамоаси ўйинининг бир кун кейин ўтказилиши бир неча сабабга кўра қулай. Масалан, ҳар қандай мураббий учун асосий таркиб баҳси муҳимроқ. Шунинг учун унинг диққат ва эътибори иккинчи ўйинга ҳам қаратилишида етарлича вақт ҳамда шароит бўлиши керак. Айрим сабабларга кўра асосий жамоа билан ўйин амалиёти ололмаган футболчи эртасига U-21 жамоаси таркибига қўшилиши мумкин”, — деб сўз бошлади Кападзе. 

 “Ёши каттароқ футболчида ҳам ўз жисмоний ҳолатини маромида ушлаб туриш учун бир кун кейин ўтказиладиган баҳсда майдонга тушиш имконияти бор. Биласиз, жароҳатдан энди чиққан футболчи тезда асосий таркибга қўшилиши қийин. Футболчининг ўйин тонусини ушлаб туришига кўмаклашиш мақсадида U-21 жамоаси сафида унга аниқ қанча дақиқа берилишини бир кун кейин ҳал қилиш қулайроқ”. 

 Кападзе фикрида давом этди: “Асосий жамоа билан турли услублар, тактик қўлланмалар устида ишланади ва шунинг асосида таркиб шаклланади. Стандарт вазиятлар устида ишлаш, турли схемаларни қўллаш мураббий учун муҳим ва бу анча вақт оладиган жараён. Футболчи асосий беллашув қайдномасига кириши учун ҳам машғулотларда жон бериб ишлашга мажбур. Йўқса у қайдномага кира олмаслигини аниқ ҳис қилади ва табиийки, машғулотга зўр беради”. 

 Маълумот учун, Кападзе ёшлар жамоаси иштирокидаги учрашув бир кейин ўтказилиши масаласини фаол кўтариб чиққан мутахассис ҳисобланади. Мана шу форматга ўтилгач, Кападзе бошқарувидаги “Олимпик” U-21” жамоаси мамлакат чемпионлигини қўлга киритган. У аввалига асосий таркиб билан, эртасига эса ўринбосарлар билан бир хилда ишлашга эришган кам сонли мураббийлардан бири ҳисобланади.