Юрген Клопп: "Мени футбол шифокори деб чақиринг"

Германиялик мутахассис компаниянинг Зальцбург (Австрия)даги бош қароргоҳида матбуот анжумани ўтказишга ҳам улгурди. У журналистлар билан мулоқотда «Ливерпуль» ҳақидаги саволларга ҳам жавоб берди. Шунингдек, «Ред Булл»га мураббийлик қилмаслигини ҳам алоҳида таъкидлади.

Янги иши ҳақида

- Мен доимо мураббийликдан завқ олишимни айтганман. Аммо минглаб ўйинлар ва матбуот анжуманларидан сўнг, янги лавозимда ўзимни синаб кўрмоқчи бўлдим. Энди менинг ажойиб жамоам бор. Марио Гомес эса унинг бир қисмидир. Мураббий сифатида фаолият юритганимда стратегик ривожланишга ҳам катта эътибор қаратиш орқали инфратузилма ҳамда футбол маданиятига қизиқиб келганман. Мақтаниш эмас, лекин мен ишлаган ҳар бир жамоа исталган жабҳада ўсишга эришган. Агар хоҳласангиз, мени футбол шифокори деб чақиринг - керак бўлганда ёрдам бераман албатта.

Германияда «РБ» клублари танқид қилиниши ҳақида:

- Мен «РБ Лейпциг» - «Вердер» ўйинини томоша қилиш учун стадионга бордим ва ўйингоҳга 47000 мухлис ташриф буюрганини кўрдим, уларнинг 42000таси «Лейпциг»га ишқибозлик қилишди. Ўзингиз ўйлаб кўринг, улар яхши футболга лойиқ эмасми? Нафақат бу ерда, балки Зальцбург, Нью-Йорк, Япония ва Бразилияда ҳам. Тўғриси, менга футбол одамларга қувонч келтириши ёқади.

Мураббийлик ҳақида:

- Ишонтириб айтаманки, «РБ Лейпциг» ёки бошқа «Ред Булл» тизимидаги жамоаларга мураббийлик қилмайман. Қўлимдан келганича буни кафолатлайман. Энди мураббий бўлиб ишлаш ниятим йўқ. Умид қиламанки, компания шафелигида бу савол умуман туғилмайдиган тизим қурамиз.

«Ливерпул»нинг муваффақияти ҳақида:

- «Ливерпуль» жуда яхши ўйин кўрсатаётганидан хурсандман. Мен Арне Слот ва баъзи ўйинчилар билан ҳали ҳам гаплашиб тураман ва уларга энг яхши тилакларимни тилайман. Шунингдек, ҳаммага «Ливерпул»нинг ўйинини кўришни маслаҳат бераман. Чунки, улар ажойиб футбол намойиш этишади. Эҳтимол, «мерсисайд» клуби ҳозир дун­ёдаги энг бар­қарор жамоадир.

Трент Александер-Арнольд ҳақида:

- Афсуски, ҳали ҳам унинг ҳимоядаги ўйини ҳақида танқидий кайфиятдаги одамлар топилади. Яхшиси, энди бу борада ташвишланмаганим маъқул. Мен Арне Слотдан бир нечта матбуот анжуманларида у ҳақда сўраган журналистларни кўрдим. Муносабатим: Нега улар ҳалигача Трент энг яхшиларидан бири эканлигини тушуна олишмаяпти?! Ҳа, у «Манчестер Юнайтед»га қарши бироз ишончсиз ўйнади, аммо келинглар Трентнинг яхши ўйинларидан кейин ҳам худди шундай шов-шув кўтарайлик.

Муҳаммад Салоҳ ҳақида:

- Умид қиламанки, у жамоада қолади. Салоҳ замонамизнинг энг буюк ҳужумчиси. Фантастик футболчи. Айтиш жоиз бўлса, Мисрнинг замонавий миллионлар ўйинидаги энг яхши элчиси.

Клублар ўртасидаги янги жаҳон чемпионати ҳақида:

- «РБ Зальцбург»нинг жаҳон чемпионатида иштирок этишидан хабарим бор. Лекин мазкур мусобақа менга ёқмаяпти. Сабаби бу футболчиларни ёзги таътилсиз қолдириш демакдир. Ким бу турнир ғолиблигини қўлга киритса, энг бахтсиз чемпион бўлади. Чунки, улар бутун ёз бўйи расмий ўйинларда майдонга тушишади ва кейин дарҳол янги мавсум бошланади. Европа футболида тиғиз тақвим ортидан жароҳатлар кўпайиб кетяпти. Қачондир ўйинлар сонини камайтиришга тўғри келади. Ёки таркибдаги футболчилар рўйхатини кўпайтириш ҳозирда бу масалага - бошқа ечим кўрмаяпман.

«Ливерпул»нинг чемпионлик имкониятлари ҳақида:

- Агар «Ливерпуль» чемпионликни қўлга киритса, мен дарҳол Англияга чипта буюртма қиламан. Шунингдек, ғалабани биргаликда нишонлаш учун ҳаммани меҳмон қиламан. Келинг, ўша куни майдонда парад ўтказайлик. Мухлислар қандай унвон қўлга киритилганлигини яхшироқ ҳис қилишсин. Лекин чемпионлик ҳақида бонг уришга бироз эрта. Футболда келажакда нималар рўй беришини олдиндан билиб бўлмайди. Яхшиси вазиятни жимгина кузатиб турган маъ­қул.

ХУРШИДБЕК тайёрлади