90 очко ҳам етарли эмас

Вақтида АПЛда ҳам грандларни қийнаб қўйиши билан мухлислар меҳрини қозонган жамоа 46та ўйинда 90 очко жамғарди. «Товуслар» кейинчалик АПЛга чиқиш ҳуқуқини берувчи «плей-офф» босқичи финалида «Саутгемптон»га 0:1 ҳисобида ютқазиб, келаси мавсум ҳам Чемпионшипда қоладиган бўлишди.

«Лидс»нинг натижаси шуниси билан аламлики, охирги 26 йил бадалига Чемпионшипда 90та ёки кўпроқ очко тўплаган бирор жамоа АПЛ йўлланмасидан қуруқ қолмаганди. Англия футболида бунақаси охирги марта мавсум-1997|1998да кузатилганди. Ўшанда «Сандерленд» иккинчи даражали лига ўйинларида айнан 90 очко ишлаб, якунда 3-ўринни эгаллаганди. 

Ўхшаш томони, «Сандерленд» ҳам худди «Лидс» каби «плей-офф» босқичи финалига чиққан, аммо якунда... Хуллас, «Чарльтон»га қарши кечган ҳал қилувчи ўйин «қора мушуклар» учун ўта аламли хотима топганди. Яъни томонлар асосий вақтда 4тадан гол уришган. 4:4 - финал учун ноёб ҳисоб. Пенальтилар сериясида эса омад «Сандерленд»дан юз ўгирган - 6:7. Мана, «Лидс» 26 йиллик танаффусдан кейин «қора мушуклар» тушган ҳолатни ўзида синаб кўрди. Таққослаш учун, якунда АПЛда ўйнаш ҳуқуқини берган учинчи йўлланмага эга чиққан «Саутгемптон» лигада 87 очко билан 4-ўринни эгаллаганди. Чемпионшипнинг ўзига хос томонларидан бири ҳам шу - баъзан 3 ва 4-ўринлар ўз аҳамиятини буткул йўқотиши мумкин...