Аббосбек ЦСКА билан 3+1 йиллик шартнома имзолади ва 21-рақамда ўйнайди

19 ёшли яримҳимоячи трансфери учун ЦСКА «Пахтакор»га 500 минг евро тўлаши хабар қилинганди. Файзуллаевнинг амалдаги келишуви 2025 йилга қадар белгиланган бўлса-да, футболчи ва унинг агенти хоҳишига кўра, Москва клуби шартномадаги товон пули сифатида кўрсатилган ярим миллион еврони тўлашга қарор қилган ва трансферни амалга оширган. Аббосбек ЦСКА билан «3+1» кўринишида шартнома имзолади.Transfermarkt порталида Файзуллаевнинг трансфер баҳоси 750 минг евро қилиб кўрсатилган.

Аббосбек – РПЛ тарихида Ўзбекистоннинг 49-вакили бўлди. Ҳозирда лигада яна уч нафар ўзбекистонлик тўп тепмоқда: Рустам Ашурматов ва Умарали Раҳмоналиев (иккиси ҳам – «Рубин»да), шунингдек Иброҳимхалил Йўлдошев («Пари НН»). РПЛда муваффақиятли тўп сурган футболчилар сифатида – Миржалол Қосимов («Алания»), Виталий Денисов (ЦСКА, «Локомотив», «Криля Советов» ва «Рубин»), Одил Аҳмедов («Анжи», «Краснодар») ва Элдор Шомуродовни («Ростов») келтириш мумкин.

Москванинг ЦСКА клуби янги аъзоси Аббосбек Файзуллаев шартнома имзоланганидан кейин жамоадаги илк таассуротлари, мақсадлари ва «ҳарбийлар» сафидан ким яқиндан таниш эканини айтиб ўтди.

«ЦСКА жамоасига ўтганимдан жуда ҳам хурсандман. Бу клуб Россиянинг энг совриндор жамоаларидан бири. Умид қиламанки, барча ўйлаганларим амалга ошади – ўзимни кўрсатиб, янада ўсишга эришаман.

Менга майдонда кўпроқ «ўнлик» сифатида тўп суриш ёқади. Шунингдек, чап ва ўнг қанот вингери бўлиб ҳам ўйнай оламан. ЦСКАнинг муҳим ўйинчиларидан бирига айланиб, клуб билан барча совринларни қўлга киритишни истайман. 

Ҳали ҳеч ким билан дўстлашганим йўқ, фақат Баха ака (Бахтиёр Зайнутдинов, қозоғистонлик футболчи) билан бироз танишман. Жамоадагилар билан тезроқ учрашиб, барча йигитлар билан дўстлашишни хоҳлайман», - дейди Аббосбек клуб расмий сайтига.
Айтганча, маълумотларга кўра  Москва клубидан ташқари Туркиянинг «Фенербахче» клуби ҳам қизиқиш бўлгани, аммо Аббос ушбу жамоага ўтишни истамаган.

Файзуллаев «Пахтакор» клуби тарбияланувчиси ҳисобланади. Ҳали клуб академиясида эканидаёқ ўсмирлар термасига чақирилган. 2021 йил май ойида Файзуллаев «Пахтакор»нинг асосий жамоасида, шунингдек Ўзбекистон ёшлар жамоасида дебют қилади. Биринчи мавсумида у клубда тўққиз ўйинда қатнашиб, майдонда жами 280 дақиқа ўтказади. Кейинги мавсумда эса Аббосбек «Пахтакор»нинг асосий таркиб футболчисига айланади: 26 ўйинда майдонга тушиб, саккиз гол уради ҳамда икки голга узатма беради. Ўзбекистон жамоаси билан 2022 йилги Осиё Кубоги U23 турнирида ҳам иштирок этганди, йил якунида Ўзбекистон футбол федерацияси уни «Ёш юлдуз» сифатида тақдирлаганди.

Шунингдек, у жорий мавсум Суперлигада 6 ўйинда майдонга тушиб, 2 та голга муаллифлик қилган ва бир голга узатма берган. Июн ойида Аббосбек мамлакат миллий жамоаси учун ҳам дебютини амалга оширди: Уммонга қарши ўйин (3:0) охирида 17 дақиқа ҳаракат қилди. Тожикистонга қарши кечган иккинчи ўйинда (5:1) ҳам захирадан тушиб, миллий жамоа учун дебют голини урди.

У 2023 йил март ойида ёшлар ўртасидаги Осиё кубоги U20 турнири қаҳрамонларидан бирига айланиб, Ўзбекистон U20 жамоаси билан қитъа чемпионлигини қўлга киритганди, турнирнинг энг яхши футболчиси деб топилди. Аргентинада ўтган ёшлар ўртасидаги жаҳон чемпионатида 4 ўйинда майдонга тушиб, битта гол ва ассист муаллифига айланганди.

Эслатиб ўтамиз, бу армиячилар клубида шу кунгача Юрий Пшеничников, Биродан Абдураимов, Улуғбек Бақоев, Даврон Файзиекв, Александр Гейнрих ва  Виталий Денисов каби ўзбекистонлик футболчилар фаолият юритишган.