Абрахам учун йил тугади

«А» серия сўнгги тури доирасидаги «Рома»нинг «Специя»га қарши ўйинида (2:1) англиялик ҳужумчининг хочсимон тизза пайлари узилиб, майдонни эрта тарк этганди. Инсайдер Фабрицио Романонинг ёзишича, Абрахам жарроҳлик амалиётидан кейин декабрь ойигача майдонга туша олмайди. Мавсум якунида ижара муддати якунига етиб, келишувга кўра Элдор Шомуродов «Рома» сафига қайтиши лозим бўлса-да, шунга қарамай Рим клуби раҳбарияти Абрахам ўрнига ҳужумчи излашга тушган. Calciomercato хабарига кўра, «Рома» англиялик ҳужумчи ўрнига «Специя»нинг анголалик ҳужумчиси Мбала Нзолага таклиф билан чиқмоқчи. 26 ёшли форвард «А» серия жорий мавсумида 31 ўйинда 13та гол киритиб, тўпурарлар рўйхатидан жой олди. Сўнгги ўйинларда Элдор эмас, айнан Нзола «Специя»нинг асосий таркибдан ўрин олди. Маълумот учун, «Специя» 11 июнь, якшанба куни «А» серияда қолиш учун ўйинда «Верона»га қарши майдонга тушади. Бу баҳс Шомуродов учун специяликлар сафидаги сўнгги ўйинга айланиши кутилмоқда. У жорий мавсум «Специя» сафида 15 ўйинда майдонга тушиб, 1та гол ва 1та ассистга муаллифлик қилган. «Рома» «А» серияда 6-ўринни эгаллаб, кейинги мавсум ҳам Европа Лигасида иштирок этадиган бўлди.