Барча даврларнинг энг қиммат футболчилари

 Бу эса айрим футболчилар ўз фаолиятлари давомида шундай харажатларга сабаб бўлишларини англатади. Рекорд даражасидаги бир марталик гонорарлар нашрлар сарлавҳаларидан жой олса, бошқалари узоқ вақт ичида катта маблағни «сув» қиладилар. Табиийки, улар орасида сарфга яраша манфаат келтирганлари ҳам, клубларни чув туширганлари ҳам бор. Узоқ вақт Николя Анелька умумий харажатлар бўйича барча даврларнинг энг қимматбаҳо футболчиси бўлиб келди. Бироқ замонавий футболдаги астрономик харажатлар туфайли ҳатто етакчи ўнликдан ҳам четда қолди. Энди навбат пешқадамларга.

10. Златан Ибрагимович - 145 млн. фунт-стерлинг

Рўйхатимиздаги ўйинчилар орасида фақат шу футболчи 2023 йилнинг ёзида катта футбол билан хайрлашди. Фаолиятида «Аякс», «Ювентус», «Интер», «Милан», «Барселона», «ПСЖ» ва «МЮ» каби грандлар билан келишув имзолаган афсона рисоладагидек бойликка эга бўлгани аниқ. Лекин шуни алоҳида таъкидлаш жоизки, Ибра барча харажатларни оқлади, қайси жамоада ўйнаши ва ёши нечада эканлигидан қатъий назар, сермаҳсул ўйинлари билан бежизга қимматбаҳо эмаслигини исботлади.

9. Анхель Ди Мария - 147,2 млн.

Индивидуал трансферлар бўйича Ди Мария қимматбаҳо келишувларнинг етакчи йигирматалигида ҳам йўқ. Лекин бир неча марта клубларга рисоладагидек манфаат келтиргани рост. Аргентиналик плеймейкер фаолиятидаги энг йирик келишув 2014 йил ёзида амалга оширилди. Ўшанда «МЮ» уни ўз сафига қўшиб олиш учун клуб тарихидаги рекорд маблағ - 59,7 млн. фунтдан воз кечганди. Бироқ бир йилдан кейин Анхель «ПСЖ»га йўл олди, аммо гонорар рекорд мақомида эмасди - 44 млн. 2022 йилда текинга «Ювентус»га ўтган футболчи Туринда бир йил тўп суриб, яна эркин агентга айланди.

7қ. Антуан Гризманн - 153 млн. 

Клубнинг ҳозирги молиявий ҳолатини инобатга олсак, «Барселона» 2019 йилда Гризманн билан имзолаган шартномадаги уни 108 млн. фунт эвазига қайтариб олишга оид банддан фойдаланмагани учун афсусланаётгани аниқ. Франциялик ҳужумчи «Реал Сосьедад»дан 24 млн. фунт эвазига «Атлетико»га ўтганидан 5 йил ўтгач ташриф буюрганди. Кейин жаҳон Кубоги соҳиби 21 млн. фунт эвазига «матрасчилар» сафида ижара асосида тўп сурди.

7қ. Усмон Дембеле - 153 млн.

«Барса»нинг нима сабабдан оғир вазиятга тушиб қолганини тушуна бошлаган бўлсангиз керак, тўғрими? Франция терма жамоасининг бир нафар футболчиси учун 100 млн. фунт сарфлашдан 2 йил аввал, Каталония гранди бошқа бир ҳужумчи учун ундан кўпроқ сарфлаганди. Дембеленинг «Камп-Ноу»даги омадсизлигига жароҳатлар сабаб бўлди. Клуб уни жуда арзон баҳода сотиб юборишга ҳам уриниб кўрди. Бироқ насибаси узилмаган футболчи аста-секин оёққа турди, спорт формасини тиклади ва энди устозига айланган Хави раҳбарлигида тобора очилиб бормоқда.

6. Килиан Мбаппе - 165,7 млн.

Бу ерда ортиқча изоҳнинг ҳожати йўқ: биргина келишув каттагина маблағнинг масаласини ҳал қилди. 2018 йилнинг ёзида «ПСЖ» Мбаппега Европанинг энг қимматбаҳо футболчиси унвонини ҳадя этди. Бироқ ЖЧда ғолиб чиққан франциялик юлдузнинг кейинги юриши... анчайин заиф бўлди. Сўнгги бир неча йил давомида «Реал» Килианни кўндиришга уриниб кўрди, лекин кўндира олмади. Ҳужумчи шартнома муддати тугашига бир мавсум қолганида кетиш ниятини ошкор этди.

5. Альваро Мората - 160,8 млн.

Ишонасизми-йўқми, лекин ўртамиёна сермаҳсуллигидан келиб чиқадиган бўлсак, Альваро барча замонлардаги энг қимматбаҳо ўйинчилар орасида 2-ўринни эгаллайди. Испаниялик ҳужумчи учун 2017 йилда рекорд маблағ (60 млн. фунт) сарфлаган «Челси»нинг ишлари кўнгилдагидек юришиб кетмади. Бироқ жамоа 2020 йилда Моратани «Атлетико»га шу баҳода сотиш билан зарардан фориғ бўлди. Альваро яна бир неча йил тўп сурса ҳам, унинг кўрсаткичи сезиларли даражада ўзгармайди.

4. Филиппе Коутиньо - 167,9 млн.

Қани, топишга уриниб кўрингчи, юқорида зикр этилган маблағнинг 142 млн.ини ким тўлаган? Майли, бош қотирмай қўя қолинг - 2018 йил январида «Ливерпул»дан бразилиялик «ипак» йигитни харид қилган «Барселона»! Коутиньо 2013 йил январида бор-йўғи 7,5 млн. эвазига «Интер»дан «қизиллар» сафига ўтганди. Орадан 5 йил ўтган бўлсада, у ҳамон 3-энг қимматбаҳо трансфер бўлиб турибди. Ўзининг рекорд харидини «Бавария»га «сургун» қилиш учун «Барса» 18 ой уринди. Якунда футболчи «Камп-Ноу»даги шармандали ҳисобга (8:2, ЕЧЛ, 1|4 финал) 2та голи билан ҳисса қўшди. Гарчи Филиппе «Вилла Парк»да ўз нуфузини мустаҳкамлай олмаган бўлсада, «Астон Вилла»дан олинган 17 «лимон» унинг баҳосини кўтариб юборди.

3. Криштиану Роналду - 210,1 млн.

2009 йилда Роналдунинг 80 млн. фунтга «МЮ»дан «Реал»­га ўтиши трансфер бозорига сезиларли таъсир этди - астрономик миқдор янги баҳолар даври бошланганидан далолат берарди. Шунга қарамасдан, футболчининг 2018 йилда «Ювентус»га ўтиши 2021 йилда «Олд Траффорд»га қайтишига нисбатан (12,86 млн.) анча қиммат бўлди. «Ал-Наср» сафига Роналду бепул трансфер сифатида қўшилди.

2. Неймар - 248,8 млн.

Футбол тарихидаги энг қиммат трансфер иштирокчисининг рўйхатдан жой олиши ва юқори ўриндан жой олгани ажабланарли эмас. Сиз уни ёқтиришингиз ёки ёмон кўришингиздан қатъий назар, Неймар - баҳоси 200 млн. фунт бўлган чинакам суперюлдуз. 2017 йилда уни «Барса»дан юлиб олиш учун «ПСЖ» айнан шунча маблағдан воз кечганди.

1. Ромелу Лукаку - 291 млн.

7 йил аввал «Стэмфорд Бриж»ни тарк этган Лукаку 2021 йилда 100 млн. фунтдан озроқ маблағ эвазига «Челси»га қайтди. Кейин арзимас 28 млн.га «Эвертон»га сотиб юборилди. Булар оралиғидаги «МЮ» ва «Интер»га ўтишлар қарийб 150 «лимон»ни «сув» қилди.

С.РАҲМОНОВ тайёрлади