CAFA чемпионатига Ўзбекистондан 3та стадион мезбонлик қилади 

Бу ҳақда Россиянинг ТАСС ахборот агентлиги хабар бермоқда.  
Аввалроқ, ФИФА кунлари доирасида 9-21 июнь санасида Россия, Эрон, Ўзбекистон, Тожикистон, Қирғизистон, Туркманистон, Афғонистон ва Осиёнинг яна бир жамоаси иштирокида илк марта Марказий Осиё футбол ассоциацияси (CAFA) турнири ўтказилиши маълум қилинганди. 

«Биринчидан, CAFA миллий жамоалар иштирокида илк турнирни ўтказишдан жуда ҳам манфаатдор. Иккинчидан, тарихга назар солсак, «Спартак», «Зенит», «Динамо», «Торпедо» сингари Россиянинг номдор клубларининг «Пахтакор», «Помир» ёки Марказий Осиёнинг байроқдор клублари билан ўйинлари доим катта қизиқишга сабаб бўлганини эслаймиз. Ўшанда ҳар бир ўйинда трибуналар мухлислар билан тўлиб, аншлаг кузатилган.

Ўйлайманки, Россиянинг CAFA турнирида иштироки мухлислар учун ҳам, ташкилотга аъзо мамлакат жамоалари учун ҳам жуда қизиқ бўлади ва бу бошқа турнирларга тайёргарлик учун айни муддаодир. 

Ўз ўрнида ЎФА томонидан бу турнир юқори савияда ўтишини кафолатлаймиз. Майдонлар шай ҳолатда бўлади. Албатта, Россия турнирда иштирок этса, бу мусобақага бўлган қизиқиш ҳар жиҳатдан ошади. Чунки Россия – нафақат Европанинг, балки жаҳоннинг ҳам етакчи миллий жамоаларидан бири саналади, шундай экан бу жамоанинг иштироки барча учун қизиқ бўлади» , - дейди CAFA ижроқўми аъзоси, ЎФА вице-президенти Равшан Эрматов.

Шунингдек, ушбу турнир қайси стадионларда ўтиши маълум қилинди… 

«Ўзбекистонда 20 ёшли футболчилар ўртасидаги Осиё кубоги якунланди. Турнир жуда муваффақиятли ўтганига гувоҳ бўлгандирсиз. Барча майдонлар аъло даражада тайёрланганди. ФИФА ва Осиё футбол конфедерацияси мусобақага тайёргарликни юқори баҳолади.

Энди CAFA турнирига ҳам «Бунёдкор», «Жар» ва «Пахтакор» стадионларини тайёрламоқчимиз. Ўйинлар асосан Осиё кубоги U20 финали ўтказилган «Бунёдкор» стадионида бўлиб ўтади», - дейди Эрматов ТАСС мухбири билан суҳбатда.

Айтганча, мазкур халқаро мусобақага Россиянинг «ГазПром» компанияси ҳомийлик қилади.