Эътироф: Ғоя/иштиёқми ёки пул?

  «Очиғи, финални фақат орзу қилардим, холос. Миллий лигалар ўртасидаги даража ва фарқни инобатга олиб, ЧЛ финалига чиқишнинг иложи йўқлигини ўйлаганим ҳам рост. Лекин биламанки, футбол ҳамиша қувноқ ва унда пул ҳар доим ҳам ғалаба қозонмаслиги мумкин. Оддий айтганда, футболда пул ўрнини ғоя, эҳтирос, иштиёқ ва эътибор билан босиш имкони бор. Эртага шу фикрим тасдиқланишидан умидворман. Охирги кунлар ЧЛда ғалаба қозониш қандай бўлиши ҳақида кўп ўйладим. Олдин буни хаёлимга ҳам келтирмаган эканман. Бугуннинг ҳақиқати шуки, ҳозир финалдамиз ва соврин ютишга ҳаракат қиламиз, албатта. Жамоамиз бирдам. Инзаги айтганидек, ҳеч қандай қўрқув йўқ. Ўзимизга мутлақо ишонамиз», - деганди Стивен Чжан.

Истанбул финали тафсилотлари ҳаммага маълум: Чжан айтганидек, «Интер» даҳшатли рақиб олдида эсанкираб қолмади, аксинча, баъзи жиҳатлар бўйича устун кўринди ҳам. Лекин тажриба/маҳорат якунда ғоя/иштиёқ устидан ғалаба қозонди. Агар «Интер» вазиятлардан фойдаланганида ва «шалпангқулоқ» кубокни ўз томонига оғдирганидами, Стивен Чжан трендга чиқарди, шубҳасиз. Аниқроғи, унинг пул ва ғоя/иштиёқ ҳақидаги хулосаси. Амалда тақдир бу сафар «Сити» мисолида тажриба ва қисман маблағ «бошини силади». Шундай бўлсада, «Интер»нинг хитойлик президентини олқишлаш керак. Зеро, у ўз жамоасига яққол фаворит саналган рақибга қарши ўйин олдидан зарур мотивация бера олди.

СТИВЕН ЧЖАН

• 2018 йили 26 ёшида «Интер» президенти лавозимида иш бошлади. У клуб тарихидаги энг ёш президентдир
• Стивен Чжан - «Интер» соҳиби Чжан Цзиндуннинг ўғли
• Стивен Чжан - иқтисодчи. У олий таълимни АҚШда олди
• Стивен Чжан «Интер» президенти сифатидаги ишини қарз масаласини ечиш билан бошлади ва биринчи кундаёқ муаммони ҳал қилди
• 2019 йили «Интер» ташкилоти баҳоси 41 фоиз ошиб, 692 миллион еврога етди. Бу бутун Европадаги клублар учун энг юқори ўсиш суръатидир
• Стивен Чжан «Интер» раҳбари ролидаги фаолияти давомида Ромелу Лукаку, Диего Годин, Кристиан Эриксен, Алексис Санчес, Артуро Видаль, Ҳоқон Чалханоглу, Лаутаро Мартинес, Ашраф Ҳакими, Генрих Мхитарян ва Эдин Жеко каби юлдузлар билан шартнома тузди
• Стивен Чжан «Интер» спорт директори лавозимига машҳур Жузеппе Мораттани жалб этди

«Интер» Стивен Чжан даврида 2020 йили ЕЛ финалида ўйнади, 2021 йили «А» серия ғолибига айланди, 2022 ва 2023 йиллар Италия суперкубогини ютди, 2022 йили Италия кубогига эга чиқди, 2023 йили эса ЧЛ финалида ўйнади