ЎФА раҳбарияти олимпиячиларимиз билан учрашув ўтказди

Ўзбекистон U-23 терма жамоаси гуруҳ босқичида Испания, Миср ва Доминикан Республикаси жамоаларига қарши баҳс олиб боради.

Бугун ушбу муҳим турнир олдидан олимпия терма жамоаси аъзолари билан учрашув ташкил этилди. Унда ЎФА, Спорт вазирлиги ва МОҚ раҳбарияти иштирок этди. Жамоа олдида турган ушбу мусобақа ҳақида фикр билдирилар экан, Олимпиадани бутун халқимиз, хусусан, Президентимиз ҳам катта қизиқиш билан кузатиб бориши айтиб ўтилди. Ўзбек футболи тарихида илк бора Олимпиада йўлланмаси қўлга киритилиши катта воқеа эканлиги, бироқ галдаги муҳим вазифа — ушбу мусобақада муносиб иштирок этган ҳолда медаллар учун курашиш зарурлиги таъкидланди.

“Ёшлик бу — имконият. Сизларни бутун халқимиз кузатиб турибди. Бор куч-ғайратингизни ишга солиб, муносиб иштирок этишингизга ишонамиз”, деди ЎФА президенти Абдусалом Азизов.

Ўз ўрнида жамоамизнинг бир қатор етакчи футболчилари ҳам фикрларини билдириб ўтишди. Мураббийлар штаби билан жамоанинг айни пайтдаги ҳолати ва тайёргарлик жараёни ҳақида суҳбатлашилди. Тиббий штабга футболчиларнинг соғлиги, тикланиши ва витаминизациялаш жараёни, шунингдек, футболчиларга юқори даражадаги тиббий ёрдам кўрсатиш амалиётини давом эттириш кўрсатмаси берди.

Учрашув якунида ушбу масъулиятли турнир олдидан жамоага яна бир бор омад тиладилар.