Функционерлар: Левандовски, Кагава, Гюндоган, навбатдагиси ким?

Функционерлар: Левандовски, Кагава, Гюндоган, навбатдагиси ким?

The Athletic нашри тарқатган хабарга асослансак, «Ливерпуль» спорт директори лавозимидан кетишини маълум қилиб улгурган Жулиан Уорд ўрнини германиялик Свен Мислинстат эгаллайди катта эҳтимол.

Ушбу мутахассис «Штутгарт»да иш бошлашидан олдин Дортмунд «Боруссия»си ва «Арсе­нал»да самарали фаолият олиб бориш асносида танилганди. Свен Мислинстат кашф этган футболчилар рўйхати анча узун: Роберт Левандовски, Шинжи Кагава, Илкай Гюндоган... У шунингдек, 2018 йили «Арсенал»­ни Пьер-Эмерик Обамеянг трансфери учун 64 миллион евро ажратишга кўндирган. Хўш, «Ливерпул»нинг бўлажак спорт директори ўз фаолиятидаги энг катта ишларни қандай амалга оширганди?

«Серезо Осака» (Япония)дан Шинжи Кагава трансфери. Дортмунд «Боруссия»си 2010 йили Свен Мислинстатнинг оқилона иш тутиши натижасида Япония футболида чақнаган энг иқтидорли йигитлардан бирини мутлақо текинга олди. Шинжи Кагава шу тариқа 2 йил давомида Юрген Клопп бошқарган ажойиб ансамбль етакчилари қаторида самарали тўп сурди. «Боруссия» шундан сўнг япон йигитини «МЮ»га қўйиб юборди, албатта, текинга эмас, 16 миллион евро эвазига.

«Лех» (Польша)дан Роберт Левандовски трансфери. Аслида Роберт Левандовски бошидаёқ бир қатор клублар эътиборига тушганди. Айрим жамоалар поляк трансфери масаласида тавваккал иш кўришга ҳам тайёр турганди. Хуллас, Роберт 2010 йилнинг ёзида «Блэкберн» билан шартнома имзолашга яқин келганди, бироқ об-ҳаво шароити туфайли белгиланган вақтда Англия клуби қароргоҳига боролмайди. Шундан сўнг Мислинстат ташаббусни қўлга олиб, «Боруссия» раҳбариятини бўлажак Леваголни харид қилишга ундайди. Қисқаси, германияликлар Польша клубига атиги 5 миллион евро тўлашади ва клубнинг янги тарихидаги энг кучли футболчига эга бўлишади. Бунинг самараси: Бундеслигадаги икки чемпионлик ва ЧЛ финали.

«Нюрнберг» (Германия)дан Илкай Гюндоган трансфери. Ҳа, бу футболчи ҳам Свен Мислинстат кашфиётларидан бири ҳисобланади. Дортмундликлар 2011 йили айнан унинг қистови билан ўртамиёна «Нюрнберг»­да энди-энди кўзга ташлана бошлаган Илкай Гюндоган трансферига 5,5 миллион евро тўлашганди. Германия­лик турк кейинги 5 йил давомида «Боруссия»да етук футболчи сифатида шаклланди ва «Манчестер Сити»га йўл олди - 27 миллион евро эвазига.

Свен Милсинстатнинг энг катта трансфери - бу Пьер-Эмерик Обамеянг. Арсен Венгер ва «Арсенал» раҳбариятини габонлик ҳужумчи учун 64 миллион евро тўлашга айнан Свен кўндирган эди. Чунончи, Мислинстат Дортмундда порлаган Обамеянгни шахсан танирди. Айтиш керак, «Арсенал»нинг бу трансфери ўзини тўла оқлади, гарчи габонлик Лондондаги фаолиятининг якуний қисмида турли муаммоларга ўралашиб қолган бўлсада. Лекин факт фактлигича қолади - Пьер-Эмерик «канонирлар» сафидаги 163та ўйин­да 92та гол урди.

А.АБДУВАЛИХЎЖАЕВ тайёрлади

Пўлатов Мухаммадхон

Involved in this affair, He trusts to you how the Dodo solemnly, rising to its feet, 'I move that.