Мустафо 66 йилда «Олтин тўп»ни ютган энг ёши катта футболчи бўлди ва...

Мукофотни кутилганидек «Реал»нинг француз ҳужумчиси Карим Мустафо Бензема қўлга киритди.

Бензема — сўнгги 66 йилда «Олтин тўп»ни ютган энг ёши катта футболчи бўлди. «Олтин тўп»ни қўлга киритганлар орасида Каримдан фақат бир футболчининг ёши катта бўлган. «Реал» ҳужумчиси 34 ёш 290 кунлигида жаҳон футболининг асосий индивидуал совринини қўлга киритди. Фақатгина Стэнли Мэттьюз «Олтин тўп»ни ютганида, француздан катта эди. Англиялик футболчи 1956 йилда — 41 ёшу 321 кунлигида бунга эришган.

* Бензема мазкур совринни қўлга киритган 5-франциялик футболчига айланди. Олдинроқ, Раймон Копа (1958), Мишель Платини (1983, 1984, 1985), Жан-Пьер Папен (1991), Зинедин Зидан (1998) ушбу соврин эгасига айланган.

* Бензема йил футболчисига айланган «Реал»нинг 8-ўйинчиси сифатида қайд этилди. Аввалроқ, Альфредо Ди Стефано (1957, 1959), Раймон Копа (1958), Луиш Фигу (2000), Роналдо (2002), Фабио Каннаваро (2006), Криштиану Роналду (2013, 2014, 2016, 2017) ҳамда Лука Модрич (2018) мазкур номга эришганди. Умуман олганда, «Реал Мадрид» футболчилари «Олтин тўп»ни 12 марта қўлга киритишган. «Барселона» футболчилари ҳам шунча мукофотга эга. Баъзи манбалар Каталония клуби вакиллари 13 та совринни қўлга киритишганини таъкидламоқда, аммо Лионель Месси 7-«Олтин тўп»ини «ПСЖ» футболчиси сифатида олган.

* Жанубий Корея термаси ҳамда «Тоттенхэм» вингери Сон Хён Мин «Олтин тўп-2022» бош соврин учун давогарлар рўйхатида 11-ўринда қайд этилди. Бу «Олтин тўп» тарихида осиёлик футболчилар орасида кўрсатилган энг юқори натижадир. Сон ўтган мавсум «шпорлар» сафида 45 ўйинда қатнашиб, 24та гол урди ва 8та ассистни ўз ҳисобига ёздирди.

* Замонамизнинг энг кучли футболчилари - Криштиану Роналду ва Лионель Месси 2008 йилдан буён илк марта бош соврин учун даъвогарларнинг кучли учлигига кира олишмади. Бунгача Leo ёки CR7, ёки бўлмаса ҳар иккиси «учлик»дан албатта, ўрин олишганди. Бу гал Месси даъвогарлар рўйхатига умуман киритилмаган бўлса, Роналду 20-ўринга лойиқ кўрилди.

БЕНЗЕМА ҲАҚИДА СИЗ БИЛМАГАН ФАКТЛАР

«Лион»да болбойлик қилган

Карим Мустафо Бензема Лион шаҳри чеккасида туғилган ва болалигида маҳаллий «Брон Террайон» клубида ўйнаган. У ерда 9 ёшли Каримни «Лион» скаутлари пайқаб қолишди ва дарҳол уни қўлга киритмоқчи бўлишди. Аммо «Брон» раҳбарияти иқтидорни беришни истамади. «Лион» вакиллари Бенземанинг отасини кўндирганидан кейингина келишув якунланди. «Лион»нинг ўзида ҳам илк кунларданоқ Карим имтиёзга эга бўлди. Ва у доимий равишда асосий стадионда пайдо бўлиб, у ерда катта ёшли футболчиларга тўп узатиб турди, яъни болбойлик қилди.

Жазоир термасида ўйнаши мумкин эди

Бенземанинг терма жамоаси ҳам бошқа бўлиши мумкин. У Францияда туғилган, аммо у ҳам худди Зинедин Зидан каби жазоирлик илдизларга эга. Жазоир терма жамоаси эса ҳақиқатдан ҳам иккинчи юлдузни йўқотишни истамади. Улар Каримни «Лион»да порлаётган пайтда терма жамоага чақиришга фаол ҳаракат қилишди. Аммо Зидан каби Бензема ҳам кучлироқ жамоани танлади. Албатта, у французлар учун ЖЧ-2018 ғолиби бўлган таркибда йўқ эди, лекин камида битта соврин бор - Миллатлар Лигаси.

«Реал»да энг кўп ўйин ўтказган легионер

Ҳа, бу ерда Криштиануни ҳам кўриш мумкин эди, лекин чиндан ҳам «Реал»да испаниялик бўлмаган футболчилар орасида Каримдан кўпроқ ўйинда майдонга тушгани йўқ. Ҳатто афсонавий Марселода ҳам 545та учрашув бор. Каримда эса 600дан ортиқ. Бу рақам ҳар ҳафта ортиб бормоқда. Шундай экан, бу рекорд жуда узоқ вақт янгиланмаслиги аниқ.

Гиннеснинг рекордлар китобига киритилган

Сўнгги ўн йилликда Месси ва Роналдуни солиштириш одатий ҳол эди. Аммо афсонавий аргентиналик билан бир кўрсаткичда Криш эмас, балки Бензема баҳслашган. 2021 йилда Бензема Чемпионлар Лигасида кетма-кет энг кўп гол урган мавсумлари бўйича Гиннеснинг рекордлар китобига кирди. У 17 мавсумдан бери Европанинг энг кучли турнирида гол уриб келяпти, худди Лионел Месси каби.

«ОЛТИН ТЎП»НИНГ БАРЧА СОҲИБЛАРИ