Нигоҳ: «Сан-Паоло»да осон эмас...

Нигоҳ: «Сан-Паоло»да осон эмас...

Юрген Клопп учун «қора кунлар» давом этмоқда. АПЛда бемажол старт олган «Ливерпуль» (дастлабки 6 турда атиги 9 очко ва 7-ўрин!) ЕЧЛ гуруҳ босқичи стартида ҳам ўта ношуд кўринди.

Германиялик мутахассиснинг тажовузкор жамоаси Неаполда «Наполи»га айтарли қаршилик кўрсатолмади - 1:4 ҳисобли мағлубият бунга далил.

Goal маълумоти бўйича айтсак, ўзи «Наполи» Юрген Клопп жамоалари учун энг ноқулай рақиблардан бири ҳисобланади. Ҳар ҳолда, германиялик тан олинган мутахассис 7 сентябрь оқшоми шовқинли «Сан-Паоло» стадионида 4-марта мағлубликни тан олди. Клоппнинг мураббий сифатида Неаполга биринчи ташрифи 2013 йили кузатилган бўлиб, ўшанда «Боруссия» Д. ортга 1:2 ҳисобидаги мағлубият билан қайтганди. 

Клопп «Сан-Паоло»даги кейинги 3та омадсиз ўйинни «Ливерпуль» бошқарувида ўтказди. Диққат қилинг, «қизиллар» бунда 1тагина гол уриб, 7та қўйиб юборишди. «Ливерпуль» 2018 ва 2019 йилларда ҳам «Наполи»га қарши сафар ўйинларида ҳеч нарса қилолмаганди. Бу сафар эса 4та гол қўйиб юборган ҳолда, мутлақ мағлубиятга дуч келди. Ҳа, Юрген Клопп ва «Ливерпуль» учун «Сан-Паоло»да осон эмас. 

Факт. «Наполи» ЧЛнинг 1та ўйинида Юрген Клопп бошқарувидаги «Ливерпуль» дарвозасига 4та гол урган иккинчи клуб бўлди. «Қизиллар» бунга қадар фақат 2018 йилнинг 2 май куни ЧЛ ярим финал ўйинида «Рома»дан 4та гол қабул қилишганди (2:4). Умуман, «Ливерпуль» Неаполь сафарига қадар 2021 йилнинг февралидан буён 1та ўйинда 4та гол қўйиб юбормаганди. Ўшанда жамоа АПЛ доирасида «Манчестер Сити»га 1:4 ҳисобида ютқазганди.