Озил ва Кркич фаолиятларини тугатишди

34 ёшли ярим ҳимоячи жорий йилги мавсумни Туркиянинг «Истанбул Бешакшеҳир» клубида ўтказаётган эди. Озил клуби сафида бу мавсум бор йўғи 5 ўйинда майдонга тушганди. Германиялик футболчи 8 йиллик фаолиятидан кейин 2021 йил «Арсенал» билан хайрлашгач, сўнгги икки мавсумни «Фенербахче» ва «Истанбул Бешакшеҳир» клубларида ўтказди. Эслатиб ўтамиз, Озил 2014 йил Германия миллий жамоаси сафида жаҳон чемпиони бўлганди. ЖЧ-2010да эса бронза медалига эга чиққан. У «Шальке», «Вердер», «Реал» клублари сафида ҳам тўп сурган.

Шунингдек, «Барселона» ва «Милан»нинг собиқ футболчиси Боян Кркич ҳам 32 ёшида фаолиятини якунлашга қарор қилди. Кркич ҳозирда фаолиятини Японияда, «Виссел Кобе» сафида давом эттираётган эди. Унга япон клубида «Барселона»даги танишлари Андреас Иньеста ва Серхи Сампер ҳамкорлик қилган. Боян фаолияти давомида Испания Ла Лигасидан ташқари Англия Премьер-лигаси, Италия «А» серияси ва МЛСнинг бир қатор клубларида ҳам тўп сурган.