РЕЙТИНГ: Transfermarkt портали нима дейди?

Жумладан, бизнинг лигионерларимиз трансфер суммасида ҳам баъзи ўзгаришлар бор.

Аббос Файзуллаевнинг РПЛдаги ёрқин ўйинлари transfermarkt портали назаридан ҳам четда қолгани йўқ. ЦСКА сафига енгилгина қўшилган ҳамюртимиз Россия чемпионатининг дастлабки қисмида трансфер суммасини оширган 80 нафар футболчидан бири бўлди. Эътиборли томони, Файзуллаев трансфер баҳоси бўйича катта ўсишга эришганлар рейтингида топ-10га кирди. Рақамларда айтсак, умидли футболчимизнинг трансфер суммаси қисқа вақтда 750 мингдан 2 миллион еврога ошди. Демак, ўсиш даражаси Қ1,25 млн. еврога тенг. Бу РПЛда кузатилган 8-юқори натижадир. «Рубин»да ўйнаётган Умарали Раҳмоналиев трансферида ҳам ўсиш бор - 20 ёшли легионеримизнинг баҳоси 3 ой ичида 400 минг­дан 600 минг еврога кўтарилди. Рустам Ашурматов («Рубин») баҳоси эса бироз пасайди - 850 мингдан 700 минг евро. «Пари НН» вакиллари Иброҳимхалил Йўлдошев (900 минг евро) ва Руслан Жиянов (450 минг евро) трансфер суммасида эса ўзгариш йўқ.

Шу ўринда яна бир маълумот: Аббос Файзуллаев РПЛ 10-турида энг тез югурган футболчилар рўйхатида 2-ўринни эгаллади. Яъни «Балтика» билан баҳсда ҳамюртимизнинг максимал тезлиги соатига 33,87 километрни ташкил қилди. Бу борада фақат «Ахмат» вакили Камило (соатига 33,97 километр) юқорироқ натижа қайд этди. Эътиборлиси, топ-5 легионерлардан ортмади: Камило (Бразилия), Аббос Файзуллаев (Ўзбекистон), Брайан Мансилья (Аргентина), Роберто Фернандес (Парагвай) ва Дуглас Сантос (Бразилия). «ЦСКАдаги Файзуллаев каби тана тузилишига эга йигитларнинг РПЛда муваффақиятли ўйнашларига ҳамиша шубҳа билан қарашга одатланганмиз. Чунки чемпионат футболчилардан жисмоний қувват ва атлетик салоҳият талаб қилиши хусусида тушунча бор. Мана, энди бўйи нисбатан паст, жисмонан ихчам, лекин тезкор, мувозанатни яхши сақлайдиган техник салоҳияти кучли йигит пайдо бўлди. Аббос курашдан мутлақо қочмаяпти,. Жумладан, яккакурашларга киришяпти, гавдаси кичиклигига қарамай, уларда ютиб чиқяпти. У айнан қўрқмаслиги ва техникаси эвазига чемпионатимизнинг ёрқин футболчиларидан бирига айланди. Аббоснинг ёши ва футболчилик сифатлари, шунингдек, Ўзбекистон миллий жамоаси аъзоси эканини ҳисобга олиб айтсак, унда ҳали маҳорати ва трансфер суммасини янада ошириш имконияти етарли. Шу ўринда ЦСКАнинг бу трансферда катта таваккалга қўл уришдан чўчимаганини ҳам таъкидлаш керак. Ҳар ҳолда, Файзуллаев ўз ўйини билан трансфер харажатини ортиғи билан оқлаяпти», - деди россиялик таниқли эксперт Александр Тильман ҳамюртимиз ҳақида.

Янгиланган трансфер суммаларига кўра, Аббос Файзуллаев ўзбекистонлик энг қимматбаҳо футболчилар рўйхатида 4-ўринда турган Жалолиддин Машарипов билан тенглашди. Етакчилик ҳамон Элдор Шомуродов қўлида (6 млн. евро). Умуман, миллий рейтингнинг кучли 10талигида 8 нафар легионер бор. Хусусан, дастлабки 7 поғона хорижда ўйнаётган футболчиларимизга тегишли.

Атгана, Туркиянинг Sporx.com нашри хабарида айтилишича, мамлакатнинг гранд клубларидан бири - «Фенербахче» Аббос Файзуллаевга жиддий қизиқмоқда. Маълум бўлишича, жамоа бош мураббийи Исмоил Карталнинг шахсан ўзи раҳбариятдан истеъдодли футболчимизни қишки трансферлар бозоридаёқ сотиб олишни сўраган. Ўз ўрнида айтиш керак, Россия футболи статистик таҳлили билан шуғулланиб келаётган Rustat компанияси РПЛнинг сентябрь ойи рамзий жамоасига ЦСКАдаги легионеримизни ҳам киритди. Яна бир қизиқарли маълумот:  «ҳарбийлар» вакили Иван Обляковнинг айтишича, Файзуллаев жамоани яқинда 30 кг. ош билан меҳмон қилибди. «Қизиқарли ҳолат. Машғулот вақти Аббос буюрт­масига асосан, қаердандир катта қозонда ош олиб келишди. Тушлик жуда зўр бўлди», - деди ЦСКА ярим ҳимоячиси.