80 мингдан 18 миллионгача!

Каталония клубида маош мувозанати қандай? Аввало, айтиш керак, Серхио Бускетс ва Жорди Альба кетишганидан сўнг маош «халта»си нисбатан вазн йўқотади, бироқ жамоанинг энг кўп ва кам иш ҳақига эга футболчилари ўртасидаги «жарлик» йўқолиб қолмайди, барибир.

ЭНГ КАМ МАОШ КИМЛАРГА ТЕГИШЛИ?

Жуда кутилмаган ҳолат - айни пайт «Барселона»да энг минимал маош Алехандро Бальдега тегишли. Унинг йиллик иш ҳақи 80 минг еврога тенг - арзимас сумма. Ҳаттоки, нотаниш Пабло Торре ҳам йилига 100 минг евро олади. Энг кам маошга эга 10 нафар футболчи рўйхатида бошқа кутилмаган исм-фамилиялар ҳам бор. Дейлик, клуб сардорлари Марк-Андре тер Штеген ва Серхи Роберто. Қолаверса, дунёнинг энг яхши марказий ҳимоячиларидан бири Роналд Араухо ҳам шу рўйхатда.

«Барселона»нинг энг кам маош олувчи футболчилари (солиқ тўловларидан кейинги сумма)

1. Алехандро Бальде - йилига 80 минг евро

2. Пабло Торре - йилига 100 минг евро

3. Арнау Тенас - йилига 170 минг евро

4. Иньяки Пена - йилига 1,5 миллион евро

5. Серхи Роберто - йилига 2,4 миллион евро

6. Эрик Гарсия - йилига 2,8 миллион евро

7. Маркос Алонсо - йилига 3 миллион евро

8. Гави - йилига 3,2 миллион евро

9. Роналд Араухо - йилига 3,3 миллион евро

10. Марк-Андре тер Штеген - йилига 4,3 миллион евро

ЭНГ КЎП МАОШ КИМЛАРГА ТЕГИШЛИ?

Тушунарлики, Жорди Альба ва Серхио Бускетснинг кетишлари «Барса»га маош харажатини бироз тўғрилаш имконини беради. Чунки икки фахрий якунланган мавсум клубнинг энг кўп маош олувчи футболчилари рўйхатида кучли учликдан жой олди. Маълумки, «блауграна» кейинги мавсум учун янги футболчилар билан шартнома тузиш ва уларни рўйхатдан ўтказиш йўлида маош чиқимини сезиларли даражада камайтириши керак. Бускетс ва Альбасиз «Барселона»нинг энг кўп маош олувчи футболчилари рўйхати ҳам ўзгаради, албатта. Яъни нидерландиялик Френки де Йонг 18 «лимон» билан етакчига айланиб олади. Айтганча, инсайдер Фабрицио Романонинг ёзишича, Альба «Барселона»га қийин молиявий ҳолатда ёрдам беришни хоҳлагани учун кетишга қарор қилди.

«Барселона»нинг энг кўп маош олувчи футболчилари (солиқ тўловларидан кейинги сумма)

1. Френки де Йонг - 18 миллион евро

2. Роберт Левандовски - 10 миллион евро

3. Ансу Фати - 6,7 миллион евро

4. Жюль Кунде - 6,5 миллион евро

5. Рафинья - 6 миллион евро

6. Усмон Дембеле - 5,76 миллион евро

7. Ферран Торрес - 4,8 миллион евро

8. Педри - 4,5 миллион евро