Ана, холос! Шоу жойи - меҳмонхона томи

Ўтган йили «Шахтёр», «Интер» ва «Реал» клублари Тирасполда меҳмон бўлганди. Навбатдаги элит меҳмон - «МЮ». Тўғри, УЕФА бу сафар минтақадаги кескин вазиятни инобатга олиб, ўйинни Приднестровьеда ўтказишга рухсат бермади. Натижада мамлакат чемпиони - «Шериф» донгдор рақибини азалий душмани «Зимбру»га қарашли Кишинёвдаги стадиионда қабул қилди.

Молдова футбол федерацияси расмий сайти чипталар сотувида аризаларнинг мислсиз оқимига дуч келди. Маълум қилинишича, «МЮ» билан ўйин чипталари савдоси бошланганидан кейин атиги 2 соат ичида сайтга 100 минг мурожаат тушган. Оддий айт­ганда, ҳар сонияда чипта сониб олишга 800 марта уриниш кузатилган. «МЮ» Молдова пойтахтига ўйиндан роппа-роса 1 кун етиб келди. Кишин­ёв аэропортида меҳмонларни чамаси 250 нафар мухлис қарши олди, лекин улар билан атиги икки футболчи қўл силкитиб саломлашди, холос. Хусусан, Криштиану Роналду ҳам аксарият футболчилар қатори дарҳол автобусга йўл олди. Хуллас, тўсиқлар туфайли бирор мухлис футболчиларга яқинлашолмади, уларга лоақал юлдузлар олдида суратга тушиш ҳам насиб этмади. Эътиборлиси, аэропортдан тўғри меҳмонхонага борган «МЮ» нафақат кечки, балки ўйин кунига белгиланган ўйинолди расмий машғулотлардан ҳам бош тортди. Меҳмонлар бунинг ўрнига эрталаб меҳмонхона томи (!)да енгил машқлар бажариш билан чекланишди. Маҳаллий мухлислар эса, бу шоуни меҳмонхонага қўшни савдо маркази ойналаридан томоша қилишди.

Ўйинга келсак, тўпга эгалик қилиш, дарвоза томон зарба йўллаш ва бошқа кўплаб кўрсаткичлар бўйича икки жамоа ўртасида катта фарқ сезилмади, аммо якунда «МЮ» биринчи бўлимда урилган 2та гол эвазига ғалаба қозонди. Асосийси, Кишинёвда чинакам ажиотаж кузатилди. Дейлик, кишинёвликлар Криштиа­ну ўйинини стадион атрофидаги уйлар ойнасидан ҳам мириқиб томоша қилишди.