Футбол атрофида: Пул муаммо эмас, аммо кутиш бор...

 Диққат қилинг, Барселонада қолган ҳашаматли автомобилларини океан ортига ўтказиши учун унга нақ 14 миллион евро керак, тўғри, бу аслида бойвучча хонанда учун муаммо эмас, фақат кутиш азоби ҳам бор...

Шакира Каталонияда яшаган вақти бир нечта қимматбаҳо суперкар сотиб олган. Алоҳида буюртма асосида тайёрланган дабдабали мебель ва мусиқа жиҳозлари яқин орада хонанданинг янги турар-жойига етказилади. Бироқ ҳашаматли автопаркни кўчириш осон эмас. Бунинг учун алоҳида транспортировка ва 14 миллион евро талаб этилади. Шакирага тегишли автоколлекцияда обрўли «тойчоқ»лар етарли: Mercedes Benz SI550, Tesla Model S, Audi Q7, Audi A7, шунингдек, BMW X6 ва Mercedes Benz SLK 250.

Ҳа, транспортировка харажати катта, лекин Шакира учун эмас. Бинобарин, хонанданинг умумий бойлиги 300 млн. долларга баҳоланмоқда. Демак, у севимли «тойчоқ»ларини Испаниядан олиб кетиш учун пул топишга қийналмайди. Аммо транспортировка ҳужжатларини тайёрлаш - ортиқча муаммо. Қолаверса, бунда жараён муддатини кутиш азоби ҳам бор.

Шакира хоним айни пайт АҚШда ўғиллари - Саша ва Милан билан бирга яшамоқда. Ўзаро келишувга биноан, Жерар Пике фарзандларининг барча харажатларидан 50 фоизини ўз зиммасига олган, лекин улар билан хоҳлаган вақтда кўришолмайди.