Футбол атрофида: Ҳаётий орзунинг рўёби

Эҳтимол, португалиялик юлдуз ўз мухлисаси саналган ҳурлиқо хонимга атайин ютқазиб бергандир, аммо бу билан факт ўзгариб қолмайди: Ана Мария стол футболида Криштиануга кичик дарс берди.

«Ал-Наср» ҳужумчиси Криштиану Роналду Португалия термасининг ФИФА кунларидан ўрин олган биринчи ўртоқлик ўйинида қатнашмади. У бу орада ўзининг персонал мухлисаларидан бири - «Грассхоппер» футболчиси Ана Мария Маркович билан стол футболи бўйича куч синашди. Криш дунёнинг энг чиройли аёл футболчисига ён босдими ёки хоним чиндан ҳам, кучлилик қилдими, ҳар ҳолда, у 4:3 ҳисобида ғалаба қозонди. Ана Мария шундан сўнг ижтимоий тармоқлардаги саҳифаларида Роналду билан учрашувини батафсил ёритди. «Грассхоппер» (Швейцария) клуби ва Хорватия аёллар терма жамоасининг 24 ёшли ҳурлиқо футболчиси Криштиану билан баҳсни ўз орзусининг ушалиши сифатида ҳам баён этди. 

Айтиш керак, ижтимоий тармоқларда 3 миллиондан кўп обуначига эга Ана Мария олдинроқ португалияликни чин кумири ўрнида кўрсатиб, унга очиқ мурожаат йўллаганди. «Криштиану, сенинг ўйинлардаги ақлни шошириб қўядиган, имконсиз туюладиган ҳаракатларингни кузатганча улғайдим. Буюк футболчиларнинг бутун бир авлодига ўзгача мотивация берганинг аниқ. Кимдадир совринлар сони сеникидан кўпдир, кимдир ҳозир сенга нисбатан юқорироқ савиядадир, буларнинг менга заррача аҳамияти йўқ. Чунки қалбимда ягона етакчи бор - бу сен! Кичик қизалоқлигимдан шундай. Абадий миннатдорчилик. Сенинг доимий 1-рақамли мухлисанг».