Кутилганидек, энг яхшиси Мане!

Сенегал миллий жамоаси ҳужумчиси Марокашдаги маросимда мукофотни қабул қилиб олди. Ёзда «Бавария»га ўтган 30 ёшли футболчи «Ливерпул»даги собиқ жамоадоши Муҳаммад Салоҳ (Миср) ва «Челси» дарвозабони Эдуард Мендини (Сенегал) ортда қолдирди. Мане ўтган мавсумда мерсисайдликлар сафида Англия Кубоги ва Англия Лига Кубогида ғолиб бўлди. Шунингдек, у «қизиллар» билан Чемпионлар Лигаси финалига чиқди ва Премьер-лигада 2-ўринни эгаллади. Садио февраль ойида миллий жамоасига ўз тарихида биринчи марта Африка Миллатлар Кубогида ғолиб чиқишга ёрдам берди. Маросимда айнан Сенегал мавсумнинг энг яхши жамоаси деб топилди.