«МЮ» Модрич ва Невешга даъвогар

Tribal Football нашри хабарига кўра, «қизил иблислар» Лука Модричга қизиқиш билдирмоқда. Аввалроқ, матбуотда тажрибали хорватиялик ўйин амалиёти камлиги туфайли январ ойида Мадрид жамоасини тарк этишни режалаштираётгани ҳақида хабарлар тарқалган эди. Англия гранди бундан унумли фойдаланиб, хорватиялик хавбекни «Олд Траффорд»га тортмоқчи. Лука «Туманли Альбион»да аввал ҳам ўйнаган. 38 ёшли футболчи «Реал»га ўтишдан олдин Лондоннинг «Тоттенхэм» жамоасида ўйнаган. Эслатиб ўтамиз, Модрич 2012 йилдан бери мадридликлар сафида ўйнаб келмоқда. Унинг трансфер нархи 10 миллион евро.

Шунингдек, «Юнайтед» таркибни кучайтириш учун «Бенфика»нинг 19 ёшли футболчиси Жоау Невешни ҳам харид қилмоқчи. Таянч ярим ҳимоячиси майдон марказини мустаҳкамлиши кераклиги айтилмоқда. Таниқли журналист Флориан Плеттенбергнинг маълум қилишича, манчестерликлар лиссабонликлар билан мавсум тугаганидан кейин музокарага киришмоқчи. «МЮ» скаутлари анчадан бери Невешнинг ўйинларини кузатиб келмоқда ва мутасаддиларга ўз хулосаларини етказяпти. «Бенфика» ярим ҳимоячисига Европанинг бир неча клубларидан қизиқиш бор. Невешнинг шартномасида унинг  трансфер учун бадал суммаси 60 миллион евро экани кўрсатилган. Transfermarkt портали эса, «Бенфика» билан яна 5 йиллик шартномаси бор ўйинчини 20 миллион еврога баҳолаган.